Mizoram hmun dang rualin vawiin khan Chapchar Kut 2015 chu ropui takin Kolasib ah pawh hman a ni a. Forests & Environment leh Labour, Employment & Industrial Training Department-te enkawltu Minister Pu Lalrinmawia Ralte chu Kolasiba Chapchar Kut 2015 lawmna Tumpui Khelmual-a neih ah Kutpa niin Kut puala programme, Chapchar Kut Working Committee in an buatsaih chu a hmanpui a ni.

Pu Lalrinmawia Ralte chuan Tumpui Khelmual-ah Kut hmang tura lokal mipuite leh Kolasib mipui zawng zawngte Chapchar Kut chibai bukin Kut duhsakna a hlan a. Kolasib chu Mizoramah, Sawrkar lamin Kut hlutna leh a hman nachang a hriat hmaa Chapchar Kut hluttu leh lo lawm tawh thintute nia a hriat thusawiin Kolasib chu Chapchar Kut hman nachang hria khaw hmasa berte zing ami an ni chu ropui a tih thu a sawi.

Chapchar Kut hi Mizo ze tha leh pi leh pute hun atanga ze tha Mizo in a kan neih angte thangtharte inzirtirna hun leh Mizo rohlu - kan lam, kan zai leh kan hnam ziarang te pholanna hun a ni a tiin hengte leh Mizo nun ze mawite hi chawi vula, chhawm nunga, an tu leh fate pawh zirtir a hlanchhawng zel turin Kut lawm turah lokal mipuite a chah a. Hnam lam chungchang sawiin Minister chuan kan hnam lam te hi nghet takin anih dan ang taka kan vawn nun leh thangtharte kan zirtir chhawn zel a pawimawh a ni, a ti a. Mizote Kut ropui ber Chapchar Kut chu hlim leh lawm taka hmang turin mipuite duhsakna a hlan a ni.

Kolasib Tumpui Khelmual-ah Chapchar Kut 2015 lawmna hun hi Pu C.T. Mawia, Chairman, Chapchar Kut Working Committee leh President, Sub Headquarters YMA, Kolasib ni bawk chuan a kaihruai a, Pu Thomas Dawngliana hnenah atangin Report ngaihtlak niin programme thawh khatna hi Pu Lalfela Sailo, Addl. DC, Kolasib District chuan lawmthu sawiin a khar a. Hemi hnu hian programme thawh hnihna hman zui nghal niin Mizo hnam lam hrang hrangte Kolasiba YMA Branch hrang hrang leh MCO Sub Headquarters ten an entir a. Mimal leh group zaithiam ten mipui kalkhawm te hi zaiin an awi a ni.