Vawiin khan All India Radio chuan Mizoram District hrang hranga a hnuaia News Correspondent-te tan ‘Orientation Workshop on Coverage of General Elections’ a buatsaih chu AIR Conference Hall, Tuikhuahtlang, Aizawl-ah CEO Pu Ashish Kundra’n a hawng.

Orientation Workshop hawnna inkhawm AIR Asst. Director (News) Pu Subhasis Chanda kaihhruaiah CEO Pu Ashish Kundra chuan thla leh maia M.P. Inthlan tur atana Mizorama inbuatsaihna kal mek zel dan leh media-te pawimawhna tur kawng hrang hrang a sawi a; a bik takin radio chu hmun hla leh kilkhawr deuh te, border area-a chengte tan a pawimawh em em a ni a ti. Nikuma Mizoram State Elections tluang taka zawhfel theih chu a lawmawm a tih thu leh media-ten an thlawp that thuah lawmthu a sawi bawk a. MP Inthlan pawh  felfai leh dik taka zawhfel a nih theih nan media-te an tangkai em em dawn a, candidate bik emaw party bik emaw duhsak lovin, hlei nei miah lova mipuiten an hriat tur dik tak chanchin leh an hriat tur thil pawimawhte thehdarh turin a chah. Rampumah inthlan reng rengah thalaite duh aiin vote an thlak tlem thin chu pawi a tih thu sawiin CEO chuan Mizoramah pawh nikum MLA inthlanah thalai voter an tlem thu leh tun MP inthlanah thalaite vote thlak tura chawk phur turin ‘Brand Ambasaador’ 20 chuang an ruat thu a tarlang a. Mizo thalaite chuan social media zingah Instagram IG) an hmang nasa ber avangin IG-ah follower ngah mi 20 chuang thlanchhuah niin anni chu an IG post-ah te MP election lam hawi thilte leh an thalaipuite vote thlak tura sawmna siam turin an ruat a ni a ti. 

Mizoram CEO Pu Ashish Kundra chuan vawiin Workshop-a rawn tel a bik takin District lama awm news correspondent-te chu an tangkai hle dawn a, an huam zauvin hmun kilkhawr zawka chengte tan an thu thehdarh a pawimawh hle dawn a ni, a ti a. Inthlan bakah sorkar hmalakna kal zel tur atan media-ten ‘Mipui Aw’ tih lam hawi programme an siam thiam leh siam tam a tul hlea a hriat thu a sawi a, hetiang programme kaltlangin mipuiten an mamawh leh sorkar atanga an beiseite chu sorkar beng a tithleng ang a, hmasawnna kalpui zel dan turah pawh hmalak a ti awlsam dawn a ni, a ti. Tun MP Election-ah hian Mizoram Electoral Roll-ah mi nuai 7 chuang an awm zingah a vawi khatna atana vote thlak tur ‘first time voter’ chu mi 52,000 an ni tih a sawi bawk.

Vawiina AIR Correspondent Workshop hawnnah hian AIR Station Director Pu D.R.Ropuia, Press Information Bureau hotupa Pu Shariq Noor leh PTI Bureau Chief Pu H.C.Vanlalruata te pawh an tel a ni.