Vawiin hian Serchhip District Election Officer Pi Sangchhin Chinzah chuan a pisaah Serchhip chanchinbumite a kawm a, Lok Sabha Election, 2019 atana Serchhip District chhunga inbuatsaihna te a hrilhfiah.

Pi Sangchhin Chinzah chuan, Lok Sabha Election atana inbuatsaihna chu hman ni lawka kan neih tak MLA General Election ang tho a nih thusawiin a danglamna erawh chu helaiah Returning Officer kan awm ta lo thung a ni, a ti a. Chuvang chuan MLA election-a  regular taka Press Brief kan neih ang kha tun tumah chuan kan nei ta lo a ni, tiin chanchinbumite nena an indawr tlem deuh tak chhan a sawifiah a. Sawrkar hmalakna kawng tinrengah chanchibumite thawhpuina tel lo chuan thil a tih hleih theih lova, in mi thawhpuina kan mamawh reng tih min hriat sak turin ka duh che u a ni, tiin chanchinbumite hi a sawm  a ni.

Pi Sangchhin Chinzah hian Election atana inbuatsaihna tlangpui sawiin hmachhawp la awm te pawh a tarlang a. District-ah Polling Station 77 a awm thu te, Dingdi Polling Station (Pink P/S) tih thin kha 8 kan neih thu te, Election Expenditure Monitoring Team hrang hrang ten hna an thawh reng thute a sawi a. Chutihrualin District chhunga Campaign Office hawn dilna te, Complaint leh MCMC kaltlanga dilna lut te an la awm loh thute tarlangin, Polling atana Training chi hrang hrang erawh chu tluang taka kalpui reng a nih thute a hrilh a. Tin, Serchhip District General Observer atana ruat chu Pu Bidol Tayeng, IAS AGMUT 2007 a nih thu leh a ni pawhin Serchhip a rawn thlen tawh thute a tarlang bawk a. Chanchinbumite hian zawhna an neih hrang hrangte an zawt bawk a ni.

Pi Sangchhin Chinzah hi Addl DEO Pu Chuauhnuna, Expenditure Monitoring Nodal Officer Pu R. Vanrengpuia, leh Pu K. Saitluanga, Media Officer, MCMC Member Secretary ni bawk ten  an tawiawm a ni.