175/2024-2025 

Dated Aizawl the 13th April, 2024 : Lok Sabha inthlanpui 2024 inbuatsaihna kal mekah Office of the Chief Electoral Officer, Mizoram leh Mizoram Cycling Association (MiCA) tangdunin tukin khan “I RIDE and VOTE for sure” tih thupuia hmamgin Cycle Rally an buatsaih a. Cycle Rally hi Lok Sabha MP thlanna a  mi tam zawkin vote an thlakna tura inhrilhriatna leh inzirtirna atan buatsaih niin, Kulikawn (tri-junction) atanga tlan tanin AMC Office, Thuampuiah an tawp a, CEO Pu Madhup Vyas hovin cyclist 103 an tel a ni.

Rally tan hma hian CEO Pu Madhup Vyas chuan  thu tawi sawiin Cyclist thahnem tak he hun ngai pawimawha an tel chu lawmawm a tih thu sawiin naupangte an rawn tel hian midangte ah chona leh phurna nasa tak a pek a beisei thu a sawi a, karleh zirtawpni a Lok Sabha inthlanpui neih turah vote a tlak that theih nan mahni zawn theuhah tan la turin kalkhawmte a sawm a ni.

Cycle Rally hi zing dar 6:00-ah  Kulikawn tri-junction atang Pu Prasanna A. Acharya, Addl. CEO chuan vailiamin Aizawl khawpui an suar tluan a, zing dar 7:30 ah AMC Office, Thuampuiah an tawp a ni.

AMC Office tualah hian inkhawm tawi buatsaih a ni a, he hunah hian Dr. H. Lianzela, Addl. CEO chuan thu sawiin, MiCA in phur leh tha tho taka Cyclist Rally an huaihawt pui chu lawmawm a tih thu a sawi a, kan hma lawka Lok Sabha MP thlan lo awm tur chu Mizorama MP thlanna neih tawh zawng zawnga vote tlak that berna a nih theih nan MiCA memberte chu mipuite hnena palai “Ambassador” an ni nghal tih a sawi a, naupang vote la nei lote pawh an chhungte leh an thenawm khawvengte vote thlak tura ngen vek turin a sawm nghal a ni. Tunhma chuan inthlanpuiah “Free and Fair” leh “Law & Order” kan thupui thin a, tunah chuan mi zawng zawng huap leh tel theihna “Participative, Accessible & Inclusive Election” kan thupuiah a tel tawh a, vote nei zawng zawngte’n inthlan hi an ngaih pawimawh a, vote hlutna leh a pawimawhna hria a Parliament ah kan aiawhtu hruaitu tha tak thawntute zingah kan tel theuh theih nan theihtawp chhuah turin kalkhawmte a sawm a ni.

MiCA President Dr Franklin Lalringngheta pawhin CEO Office nen tangruala Cycle Rally hlawhtling tak an buatsaih chu lawmawm a tih thu sawiin, MiCA in Cycle Rally an huaihawt tawh zingah cyclist an tel tam ber tum a nih thu a sawi a, Cyclist tel zinga a naupang ber chu Samuel-a, kum 10 mi a nih thu leh a upa ber chu Dr. Malsawmkima, kum 55 mi a nih thu a sawi a ni.

Cycle Rally-ah hian Aizawl Bawrhsap, DEO ni bawk Pi Nazuk Kumar, Dy. CEO Pu Henry C. Lalrawnkima, CEO Office staff-te leh MiCA member thahnem tak an tel a ni.