Vawiin khan Pu S.B.Shashank, IAS, Chief Electoral Officer, Mizoram chuan All India Radio, Aizawl-ah AIR Correspondents zawng zawng telna ‘Media Sensitization Workshop’ chu a hawng a. He Workshop hi kumin 2018 General Election neih tur chungchanga All India Radio Correspondent-ten an hriat tur tul pawimawhte leh Election Commission of India-in media coverage chungchanga kaihhruaina a chhuah zirchianna hun atan butasaih a ni.

Chief Electoral Officer chuan kum 2018 inthlanpuiah hian Mizoramah Polling Station 1164 a awm thute, Polling Station tinah pianphunga rualbanlo (Persons wih Disabilities) te tan kailawn ‘ramp’ buatsaih mek a nih thute leh tun inthlan buaipuitu tur hi mi 15000 vel lai an nih thute a tarlang a. Media pawimawhzia tarlangin mipuite thu hriatna pawimawh tak an nih bakah sorkar media-te chu thu lai tak puangchhuak zui zel tura beisei an nihzia a tarlang bawk a, thu dik lo leh thu dik chanve te, ngaihdante puang chhuak lo turin mawhphurhna sang tak an neih thu a sawi bawk. Election Commission-in din tura a tih angin Media Certification and Monitoring Committee hi district tinah din a ni tawh a, State Level MCMC leh Appellate Authority a awm thute a tarlang a. AIR Correspondent-te chu uluk taka an hna thawk turin a chah a, a bik takin Election thuchhuah leh thu puan chungchangah fimkhur taka endik hmasa zel a puang chhuak chauh turin a ngen bawk.

He Workshop-ah hian Pu Rajesh Kumar Jha, Director, NSD, New Delhi leh Pu D.R.Lalropuia, Director, AIR, Aizawl te an tel a ni.