2324/2023-2024

Aizawl, the 14th October, 2023: Vawiin chawhma dar 11 khan Chief Electoral Office, Mizoram hnuaia State Media Cell chu an Chairman Pu H.Lianzela, Addl. CEO kaihhruaiin a Pisa-ah an thukhawm.

Pu H.Lianzela chuan Election kaihhnawih inpuahchahna chak taka kalpui chhoh mek karah media leh publicity lamah tanlak zual a tul thu sawiin, mipuite vote thlak theuh tura zirtirna SVEEP Campaign kaltlanga neihte chu ngaih pawimawh zual a tul thu a sawi a. Media kaltlanga mipuite hriat tur tul puanzar leh dan palzutna awm theite enfiah reng a tul thu a sawi bawk.

Member Secretary Pu Henry C.Lalrawnkima, Deputy CEO hnen atangin report ngaihthlak a ni a. Thutkhawmah hian Social Media leh Media Monitoring Response Team atan Nodal Officer ruat niin, Media Assistant turte ruat an ni a. Chanchinbumite tan October ni 25, 2023 ah Media Sensitization Workshop buatsaih ni se an ti bawk a. SVEEP Campaign kaltlanga hmalak dan turte, Young Voters' Club din dan turte bakah Media Cell mawhphurhna leh hmalak tulte an sawiho bawk.