Mizoram Chief Electoral Officer Pu Ashish Kundra chuan vawiin khan State Media Centre-ah ‘Press Meet’ neiin naktuk vote chhiar a nih dan tur leh a kaihhnawih thil pawimawh hrang hrangte chanchinthar lakhawmtute a hrilh.

CEO Pu Ashish Kundra chuan Mizoram Inthlana vote tlak dante khaikhawmin December ni 8, 2018 thlenga voting leh poll % chu hetiang hian a tarlang : EVM kaltlanga vote tlak zat - 6.20 lakhs, Electronically Transmitted Postal Ballot System (ETPBS) - 526 leh Postal Ballots - 11,618 a ni a; chutiang atanga chhutin Mizoram pum poll percentage chu 81.64% a ni. Naktuk vote chhiar chu zing dar 8:00 AM atanga tan tur niin, tum dang ang bawkin Postal Ballot-te chhiar tan hmasa ber a ni ang a; Assembly Constituency 40 atan Strong Room 40 leh Counting Hall 40 ruat a nih thu sawiin CEO Pu Kundra chuan a vaiin Counting Centre 13 a awm dawn a, Vote chhiarna Counting Table 347 a awm bawk a ti. Zing dar 8:00AM ah Postal Ballot chhiar a nih atanga darkar chanveah EVM Votes chhiar tan nghal a ni ang a ti bawk. Counting Centre/Hall tinah Counting Observer 40 bakah Micro Observer, Counting Supervisor leh Counting Assistant te dah vek an ni dawn a; venhimna chu thuah thumin dah a ni ang a - MRP, MAP leh CAPF te an duty dawn a ni a ti. Counting Hall chhung leh a bul velah tuman mobile phone emaw thlalak theihna khawl dang ken phal a ni dawn lova, ECI phalna nei chauhin videography leh thlalak phalsak an ni ang, a ti.

CEO chuan EVM control unit chhia a awm palh takin EVM Vote chhiar rualin VVPAT counting pawh tih nghal a nih tur thu a sawi a. Counting Centre/ Hall tinah Media Centre a awm vek dawn a, hengah te hian DIPRO/IPRO te an duty vek dawn avangin vote chhiar trend leh result te chu a khat tawkin puan zel a ni ang a; Counting Hall 40 ah web streaming/casting tih vek a ni dawn bawk a ni.

Naktuk vote chhiar tur hi Directorate of I&PR Office, Treasury Square atangin mipuite hriat theih turin PA System-in vote trend/result te puan a ni dawn bawk a ni.