Nimin khan SE, Lunglei Power Circle, P&E Deparment Er. R.Lalrema hovin I&PR Conference Hall, Bazar Veng-ah Central Electricity Regulatory Commission (Deviation Settlement Mechanism) zirchianna neih a ni a. He hunah hian Lunglei Power Circle chhunga mawhphurtute zawng zawng an kal kim hle a ni.

SE, Mizoram SLDC Circle Er.Vanlalrema chuan rampuma kawlphetha dinhmun sawizauvin December 2013 atang khan rampum huapa kawlphetha siamchhuah zawng zawng chu hmun khata luanluhtirin National Load Despatch Centre(NLDC) hnuaiah hian Regional Load Despatch Centre (RLDC) 5 kaltlangin India hmun hrang hranga State Load despatch Centre (SLDC)-ah kawlphetha semdarh thin a ni, a ti a. ‘One Nation, One Grid, One Frequency’ thupui hmangin tunah chuan India ramchhung khawi hmunah pawh kawlphetha hi frequency inang vekin a awm tawh a, he frequency behchhan hian Dan thar ‘Deviation Settlement Mechanism (DSM)’ hi duanchhuah niin February ni 17, 2014 atanga hman tan a ni a. He Dan thar hi khauh taka kenkawh a nih avangin P&E Department hnathawkte chu SLDC nen tangkawpa theihtawp chhuah turin SE Er.Vanlalrema’n a chah a ni.

AE, Mizoram SLDC Division, Er. Zoramdina chuan DSM chungchang presentation a pe a, hetianga Grid Code khauh tak Mizoram pumin kan zawm theih nan Lunglei Power Circle lama an mamawh te pawh a tarlang tel a ni.

SE Lunglei Power Circle Er.R.Lalrema pawhin thu sawiin North-Eastern Grid atanga Lunglei Power Circle(LPC) thleng kawlphetha a luan luh dan a tarlang a, line chhia-te awm pawha kawlphetha in LPC a thlen theih dan tur ruahmanna ngaihtuah zel a nih dan te a sawi bawk a ni. DSM lo hman tak avanga power semdarh lamah a hma aia tan a ngaih dan te sawiin, chhim lama power semdarh chungchanga SLDC-in ruahmanna a rawn ngaihtuah pui avangin lawmthu a sawi bawk a. Lunglei Power Circle chhunga P&E hnathawktute an hnathawhna kawnga an thahnemngaihna chungah lawmthu a sawi a; chhim lama power tha taka a thlen theihna turin hma lak zel a ni, a ti bawk. Grid Discipline tha taka vawng tur chuan inbiakpawhna tha tak chhimlam in a neih theih nan EE (MRT) Er.Thanglawra leh a hoten theihtawp an chhuah mek thu leh a tha lo lai apiang chu thlak tum a ni thu a sawi bawk.

DSM zirhona hunah hian P&E Department hotuten an sawm angin Lunglei MJA, Chhimbial Chhantu leh NGO dang aiawhte pawh an tel a, Mizoram chhimlama kawlphetha dinhmun leh Department hmalakna hrang hrang ho an sawiho a ni.