Serchhip District Legal Services Authority huaihawtin vawiin nileng khan Serchhip DC Meeting Room-ah Serchhip District MJA member te pual “Legal Awareness Campaign” neih a ni a, District Bawrhsap Pi Juhi Mukherjee, IAS chuan khuallian niin a hmanpui a, Resource Person atan Pu T.Lalnunsiama, Advocate hman a ni.
Legal Awareness Campaign hawngtu khuallian District Bawrhsap chuan Press mite pawimawhzia sawiin India ram Democracy innghahna lungphum pathum (three pillars of Democracy) Legislature, Executive leh Judiciary ti a sawi thin chu lungphum (pillar) pakhat belh lehin a lungphum Pali na ah “Press” mite hi an ni tih sawiin mipuite sukthlek hrechiang ber leh mipuite mar dek thiam ber an nih avangin mipuite rilru a tha lam leh thalo lama hruai thei an ni tih inhria a mipuite thatna tura rawngbawl zel turin a fuih a, mipuiten an dikna chanvo bakah dan leh hrai an hriatfiahloh te pawh hrilhfiah a an beng tivartu an njihna hre reng turin a chah bawk a ni. Healthy Journalism pawimawhzia sawiin chanchinbu ah eng thu nge chhuah a chhuah loh tur thliar thiam turin leh an thuchhuah ah te an bawhchhiatna a awmloh nan mahni inzir peih turin a chah a, Para-Legal Volunteer te hming chhinchhiah a a tul ang apianga an hnen atang pawha thurawn la hreh lo turin a chah bawk a ni.
Thusawitu dang Pu Andrew H.Lalremruata, MIS, DIPRO pawhin chanchinbu mite chu an nihna in hrechiang turin a fuih a, tunlaiah mi in thil an chik lehzual tawh a, internet atanga thil hriat zung zungte a awl tawh avangin chanchinbu leh visual media kaltlanga thu puanzar kawngah fimkhur lehzual angai tawh ani a ti a, abikin Social Network site hrang hrangah inkawmhona leh sawihona ah te pawh Journalist te tawngkam hman leh thusawite chu mipui tamzawk chuan thudik leh thutlingah an ngai thin ani tih sawiin anmahni pawh intuaihriam reng turin leh khawtlangin parawn tlak an tih theih tura inbuatsaih reng turin a chah bawk a ni.
Vawiin Legal Awareness Campaign ah hian Resource Person Pu T.Lalnunsiama, Advocate hovin chawhma lamah Chanchinbu mite kaihhruaina leh dan hnuaia an mawhphurhna te, Protection of Children from Sexual Offences Act, 2012 chungchangte, Pawngsual case chungchangte, Protection of Women from Domestic Violence Act, 2005, Information Technology Act, 2000 leh thil pawimawh dam tam tak zirho a ni a, chawhnu lamah sawihona hun bakah zawhna leh chhanna hunte hman a ni hnu ah New Serchhip Gosen Venga Rs. Nuai 164.4 senga sak mek District Court Building an tlawh nghal a, he building hi March, 2013 a sak tan niin kumin October thla a hawn hman beisei a ni.
Vawiin Legal Awareness Campaign kaihruaitu Pi Lalrochami Ralte, MJS, SDLSA Secretary ni bawk chuan MJA member ten an programme chu an hlawkpui ngei a beisei thu sawiin, a bik takin chanchinbu mite tan phei chuan dan leh hrai hriatlohna hi chhuanlam a tlinglo a ni a ti a, Court thutlukna an tarlang dawn anih chuan a theih hram chuan thltlukna siam tura dan tlawhchhan Section etc. tarlang tel zel thin se a that thu a sawi a, Serchhip District in Chief Judicial Magistrate thar an neih thuai dawn thu pawh a sawi bawk a ni.
