Vawiin khan Aizawl DC Pu Kannan Gopinathan chuan DC Office-ah Certificate/ILP/Aadhaar Facilitation Centre a hawng. He Centre atang hian mipui mamawh certificate leh lehkha pawimawh dang hrang hrang - Tribal/ Residential/ Income Certificate/ ILP/ Aadhaar te chu hmunhma felfai zawk leh mipui tana awlsam zawk a buaipui sak an ni ang.
Aizawl DC chuan a hnuai ami ang hian Aadhar leh Tribal/ Residential/ Income Certificate diltu te tan hriattur a tarlang a ni:
Aadhaar chungchang: Aadhaar Card siam nana thlalak Biometric Enrolment chu Aizawl District-ah March 2016 thleng khan kum 5 chung lam (population mi nuai 3.6 awm zingah) nuai 2 vel thla lak hman a ni a. Thlalak chhunzawm theih a ni ta lo vang vang a. Mi nuai 1.6 chuang Aadhaar la nei lo an la bang a. Mipui mamawhna a nasat avangin September ni 1, 2016 atangin Aizawlah chuan Aadhaar thlalak tan leh a ni a, September ni 1 - November ni 30 thleng khan mi 82,000 chuangin thla an la leh ta a, chawh rualin thla khatah mi 27,000 vel thla lak hman ang a ni.
Aadhaar thlalakna atan hian senso engmah mipui tan a awm lova, miin an duh vang ni lova pawisa chawi tura titu an awm chuan an hming chiang taka hriain DC Office-ah report tur a ni a. DC Office-ah man chawi ngai lovin Mizoram EPIC/Ration Card/Driving Licence/Passport kengin Office hour chhungin thla a lak theih reng a ni. Hming leh particulars dik lo te chuan Aizawl DC Office Census Branch pan tur a ni. Thlalak dik lo erawh chu Aadhaar thlalatute kaltlanga tih a ngai.
Tribal/Residential/Income Certificate chungchang: Tribal Certificate, Residential Certificate leh Income Certificate-te hi Online chauh a pekchhuah tawh tur a ni a. Manual-a certificates pek chhuah hian harsatna tam tak- duplicate certificate pek te, hmundang atanga verification an rawn dil te leh certificate chhui a ngaih te in a buaithlak thin avanga online a pekchhuah tan a ni. Heng certificate chungchanga harsatna te tihziaawm nan hmalakna hrang hrang chhawpchhuah a ni a. Chungte chu -
- Tribal Certificate, Residential Certificate leh Income Certificate-te tan Form pakhat chiah hman a ni tawh dawn a. Hei hian a hma a form pathum a details ngai leh ngai fill up ngai tawh lovin form pakhatah a fill up nghal vek theih tawh dawn a ni. Application Form hi DC Office Website www.dcaizawl.nic.in ah download theih a ni.
- Electoral Roll details i.e. Serial no. leh Part No. te hi application form-ah fill up a ngai a, diltu tan a buaithlak thin hle. Tunah chuan Election Department nen tangkawpin heng detail-te hi e-district in an en thei tawh ang a, applicant-te tan fill up buai ngai tawh lo in awlsam takin e-district lam in an fill up sak thei tawh ang.
- Document thil tel ngai te hi form hnung lamah a inziak a, Self attestation hi original document an keng tel a nih chuan pawm a ni a. Original an keng tel lo a nih chuan Gazetted Officer in an attest chiah pawm a ni.
- Kum tin scholarship dil hun lai in certificates dil tu an tam avangin harsatna a tam thin a. August, 2016 - September 2016 chhung ringawt pawhin certificate 75,000 chuang chu DC Office, Aizawl atanga pekchhuah a ni. CSC kaltlangin Online certificate nuai khat chuang pek chhuah a ni bawk. Hemi kawnga harsatna ti tlem turin school tin te tan dil hunbik siam turn a ni a, he schedule hi school tin te hnenah pekchhuah turn a ni.
- Aizawl DC website www.dcaizawl.nic.in hi siamthat niin, a website thar hi launch a ni bawk.
