Central Sorkar hnathawkte leh pensioner-te damloh nikhuaa senso tlem zawka an inenkawl theihna tur Central Government Health Scheme (CGHS) Wellness Centre chu vawiin khan Mizorama a vawi khatna atan AIS Residential Transit Accommodation Building. No.1, New Secretariat Complex, Khatla ah Chief Secretary Pu Lalmalsawma chuan a hawng. Central Government Health Scheme hi Ministry of Health & Family Welfare in a duan niin, kum 60 chuang hman tawh a ni.

Chief Secretary chuan Mizoramah central government office tam tham tak a awm tawh thu sawiin, heng a thawkte tan hian CGHS Wellness Centre hawn thar chu tangkai hle tura a rin thu a sawi a. He scheme hian pensioner-te a huam tel avangin kum upa lam chawklo zawkte tan inentir ngaih nikhuaah pawh Wellness Centre pan mai chu a hahdamthlak phah zawk dawn a ni, a ti a. Mizoramah central sorkar hnathawk emaw pensioner zingah CGHS hnuaia hamthatna hrang hrangte hmelhriatlo palh a awm theih thu sawiin Pu Lalmalsawma chuan he scheme hnuaia inziahluh a tangkai zia a sawi a ni.

Central Government Health Scheme hamthatna dawng theite chu central sorkar hnuaia hlawh la mek te leh pensioner-te bakah anmahni a innghat an chhungte (dependent family members), Member of Parliament thu lai mek leh ni tawh te, Governor leh Lt. Governor hlui te, India zalenna sualtute, Vice President hlui te, Supreme Court Judge ni lai mek leh ni tawh te, High Court Judge retired tawh te, PIB (Delhi) hnuaia accredited journalist-te leh Delhi khawpui chhunga autonomous body thenkhat CGHS in a huam tel an tel a ni. Wellness Centre-ah hian doctor leh nurse te awmin, Wellness Centre bakah hian state chhung emaw state pawna CGHS recognized hospital hrang hrangah te inenkawlna tha zawk dawng tura damlote refer theih a ni bawk. Central Government Health Scheme hamthatna dawng thei tur hian a hranpa a inziahluh a ngai a ni. 

Vawiin CGHS Wellness Centre hawnna inkhawm hi Dr. Hiranya Kr.Sonowal, Additional Director, CGHS Guwahati chuan a kaihruai a. Pu C. Lalrosanga, DG (Retd.), DDK chuan lawmthu sawiin hun a khar a ni. Mizoram CGHS Wellness Centre thutchilh tur hian medical doctor ruat fel tawh a ni.