Village Level NLUP Monitoring Committee leh Local Council te huaihawtin vawiin chawhnu dar 2 khan Maubawk Primary School 1 ah NLUP Awaree Campaign neih a ni.

Campaign hmanpuitu Pu R. Selthuama, MLA Chairman NLUP Implementing Board chuan thu sawiin NLUP chu thil ropui tak a ni hranpa lova tanpuitu hmanraw tangkai tak erawh a ni a ti. NLUP chu kuthnathawktute chawikan nan, retheihna bawi atanga chhanchhuahna tur a ni tiin Pu Selthuama chuan NLUP tanpuina sum an dawn chu anmahni tan, an bultanna tur, an intungnunna tur a ni tih hre renga rinawm leh tha taka bul tan theuh turin a chah. NLUP hmasa khan thawktu indaihlohna avangin Monitoring lam pawh kalpui a ni lova tunah erawh khaw tinah Monitoring committee te din niin NLUP chu changtlun taka kalpui chho mek a nih thu a sawi fiah a. Monitoring team te chuan uluk leh ngun takin an vilin an endik zel dawn a. Thawk thalo chu dim an nih loh tur thu a sawi nawn bawk. Sorkarin sum a nei tawh lo, NLUP sem tur a awm tawh lo tia thu diklo thehdarhtute sawi awi a lo buai phili lo turin a chah a. Sorkar chuan 2nd instalment sem tur pawh sum mamawh tawk a nei tawh a ni a ti bawk. NLUP Implementing Board Secretary Pu Zorammuana pawhin thu sawiin hlawhtlinna atan pumpelh a awm loh thu leh taima leh thawkrim te tan chauh hlawhtlinna awm thu a tarlanga mahni tan taima tak a thawk theuh turin a sawm bawk.

Maubawk a NLUP Awareness campaign hi Local Council Chairman Pu Lalrodingliana’n a kaihruaia. Maubawk ah hian NLUP tanpuina dawngtu beneficiaries 123 an awm a ni.Awareness campaign ah hian beneficiaries an kal tha hle a an hriatchiang loh lai te sawihovin inkawm hona tha tak an hman bawk.