Mizoram Legislative Assembly Speaker Pu R. Romawia chuan Mizo mipui te chu sawrkar laka diltu leh beiseitu ringawt ni lova pe tu leh pui tu nih tum a tul zawk a ni, a ti.

He thu hi Vaivakawn a Mizoram Upa Pawl (MUP) Unit ten Upate Ni lawmna vawiina Vaivakawn Presbyterian Kohhran Centenary Hall-a an buatsaih tuma a sawi a ni. Kohhranah petu thinlung puin thahnemngai takin thawhlawm kan thawh a, YMA member niin tlawmngai takin tanpui ngaite kan tanpui bawka, mahse sorkar lakah erawh chuan kutdawh thinlung puin engkim a thlawn veka dawn kan tumna rilru hi thlak a tul hle a ni, a ti. Speaker chuan ram leh hnam tana thahnemngaihna inzirtir danah hnam dang te huat leh ngaihtheihloh thalai te thinlunga tuh lo tura chahin, hnam hmangaihna dik tak, khawi hmunah pawh awm sela Mizo hnam zemawi tlawmngaihna, huaisenna, tumruhna, thahnemngaihna leh rinawmna lan tir tura zirtir zawk hi hnam chawimawina leh hmangaihna dik tak a nih thu a sawi a. Mizo nunmawi leh Kristian ze tha kan vawn tlat chuan khawi hmunah pawh awm ila hnam zahpuiawm kan ni ngai lovang, Speaker chuan a ti.

Khawvel pum huap a Upate Ni, October ni 1 hi Vaivakawn MUP Unit hian remchanzawkna avangin vawiin September ni 30 hian an hmang a. Intihhlimna leh infuihtawnna hun hlimawm tak ni lengin an hmang a ni.