Chairman Press Council of India Justice Markandey Katju chuan Sorkar laipui Cabinet Secretary, Secretary Ministry of Information & Broadcasting leh State tin Chief Secretary hnenah lehkhathawn in chanchinbuten advertisement man an hmuh tlai thin avanga a vuithu a thawn a ni.
A lehkhathawn a a tarlan danin Sorkar Laipui, State Sorkar te, Union Territory hrang hranga thuneitute leh Sorkar hnuaia Corporation te chuan chanchinbu hrang hrangah advertisement man a pe tlai fo thin a. Chanchinbute hian advertisement man an lak thuai theih nan thuneitute dawr kual in an vir buai fo thin a ni a ti a. Chanchinbute pawhin kum tam tak a vei hnu a chhuah advertisement bill an dawn chang a tam mai. Entirnan, tunhnaia Press Council of India Committee ah pawh DAVP in kum 1997 a, chanchinbu pakhat a advertisement a chhuah man tun thlenga pek fel a la nih loh thu sawichhuah a ni.
Hetiang hi Press Council of India ngaihdan a ni lo hle in Sorkar chu mipuite tan an nih ang ngeia a thil lei man ang chi reng reng pe fel thuai thei tura ngaih a ni. Chanchinbute pawhin a hun taka an sum dawn tur an dawn theih chuan peipun emaw hman tangkai zui emaw an tan a remchang thin a chutiang anih loh erawh chuan sum tang an nei tih na a ni mai zawk ang.
PCI Chairman chuan sum reng reng te hi kum sarih dan ah chuan a hlutna a pung thin tih hre reng tura chahin kum 1997 a Rs. 100/- chu 2004 a Rs. 200/- a ni tawh ang a, 2011 a phei chuanRs. 400/- lai a ni tawh ang a ti. Chanchinbute tluang taka a kal theih nan Sorkar Department te chuan rang takin sum an pe chhuak thin tur a ni ang. Chuvangin PCI Chairman Justice Katju chuan Sorkar laipui, State leh UT hnuaia Department zawng zawng te chu advertisement an chhuah tir atanga thla khat chhung ngeia advertisement bill pe fel nghal thin turin a hriattir a. Hemi hun chunga an tlak fel hman lo anih chuan a pung kum khata 12 % hisap a pe turin a hriattir nghal bawk a ni.
Pung pek hi hremna anga ngaih tur a nih loh thu leh hei hi dan kalphung pangngai niin pung nei hman a nih chuan pek tel mai tur a ni zawk tiin a lekhathawn a chuan a tarlang a bawk ani. A lekha thawn zawm kim a nih loh chuan PCI chuan a ngawih bo pui mai mai dawn lo a ni a ti bawk.
