Ministry of Home Affairs in kum khat atana Protected Area Permit (PAP) a hlih chhunga Kohhran hrang hrangte leh Zirna In thenkhat in ram pawn lam mi(foreigners) an sawm luh te hian VISA dan leh hrai an bawhchhiat fo avangin hemi chungchanga inrawnkhawmna leh thil tul inhrilhhriatna hun chu Home Department huaihawtin vawiin khan Secretariat Conference Hall-ah neih a ni a. Kohhran, Zirna In, Travel Agent leh Association aiawh engemaw zat an tel a ni.
Hun kaihruiatu Home Secretary Pu K.Riachho, IAS chuan thuhmahruai sawiin hetiang hun buatsaih a tulna chhan tlangpui a tarlanga. A sawi danin Mizorama foreigner lo lut tam ber te chu khualzin satlaih(Tourist) nilovin Kohhran leh Zirna In kaihhnawih a lokal an ni a, mahse hengte hian dan in a phut ang diak diak nilovin khualzin satliah Visa (Tourist Visa) an rawn hman mai thin avangin Sorkar laipui lamah insawifiah ngaih chang a awm fo thin a ti a. Chuvangin zin chhan dik tak ang ngeia Visa lak a pawimawh thin a ni a ti.
Vawiin inrawnkhawmna ah hian OSD Home Department Pu David H.Lalthangliana chuan Visa Manual chhunga bung leh chang pawimawh zual a tarlanga. SP CID(SB) leh Foreigners Registration Officer ni bawk Pu C.Laldina’n Visa palzut a pawi theihzia leh hremna awm thei te a sawi a. Ram pawn atanga sumpai tanpuina lo luan luh theih dan leh a kaihhnawih dan leh hrai chungchang chu Deputy Secretary Home Department Pu Lalhriatpuia’n a hrilhfiah bawk a. Inkhawm chhimtuten sawihona hun hmangin inhrilhfiah ngai lai te chipchiar takin an zir.
