Nimin khan Pu Hiphei, Speaker, Mizoram Legislative Assembly chuan khuallian niin Chakhang Govt. Middle School Golden Jubilee lawmna Programme a hmanpui.He Chakhang Govt. M/S hi kum 1964 a din niin, Pu Hiphei hi Headmaster hmasa ber a ni.

He Golden Jubilee Lawmna-ah hian thu sawiin, Pu Hiphei chuan Chakhang Middle School-a a thawh hun lai hi Mizoram buai intan tir te kha a ni a. Mizoram chhunga School zawng zawng tih thei kha khar an ni hlawm a. A ni pawh a School enkawl Chakhang Middle School chu khar ve turin vawi tam tak ramhnuai sipai ten an hrilh chung pawhin, School naupangte hmakhua a ngaih avangin nikhat pawh school kha a khar lo a ni, a ti.

School kha kum khat emaw khar a ni ta se chuan, a school naupangte zirna a khailak tur chu thukhat, School kal leh tura zirlai naupang inko khawm leh kha thil har tak tur a ni a. School kha kum khat emaw lo kar ve ta se chuan; kha ti hunlaia a school naupangte, vawiina sawrkar hna tha tak thawk leh Kohhranah leh khawtlanga mi hmantlak tak lo ni ta hian tun dinhmun hi an thleng thei ang em aw? tih a ngaituah thin thu a sawi lang bawk.

Speaker Pu Hiphei chuan Pathian hian kawng awlsam leh pumpelh kawng ngawt zawh tur hian min siam lo va, A mah pathian rinchhana kan hring nun zin kawnga Harsatna te leh buaina te hi huaisen taka tawn tlang turin min duh zawk thin a ni, chu chuan mi puitlingah min siam zawk thin a lo ni, a ti. Pu Hiphei chuan zirlai naupangte chu zuk leh hmuamah inthiarfihlim tura chahin, kan taksa hi Pathian In a ni a, kan tibawhlawh thiang lo a ni, a ti a. Zirlai naupangte chu, Rinawmna, tumruhna leh Huaisenna bakah a pawimawh ber Pathian Tihna an vawn tlat chuan eng Harsatna mahin an kawng a dal thei ngai lo vang a ti bawk.

He Chakhang Govt. Middle School Golden Jubilee lawman programme-ah hian Pu K.Hrahmô, EM(LAD), MADC chu Khualzahawm a ni a. He School din tir laia a kul atai lo thawktu VC Member te hnenah chawimawina Certificate pek an ni a. He School-a lo thawk tawh teaching staff leh Non- teaching staff mualliam tawhte tuarpui hun pawh hman a ni bawk.

Khuallian Pu Hiphei hian Chakhang M/S tanpui nan Rs.10,000/- a hlan nghal bawk a ni.

Attachment

  • Loading attachment...