Mizoram Police Subordinate Officers Association (MPSOA ) te chuan kum hnih dana an neih thin General Asssembly vawi -19 na vawiin chawhma dar 10 khan Vanapa Hall ah an hmang. Home Minister Pu R. Lalzirliana leh Pu Zorammawia IPS, IGP Mizoram te pawh in he hun hi an hman pui a ni.

MPSOA member te chu Dan leh thupek kengkawh tu pawimawh tak leh mawhphurhna an kova inghat nasa tak an nih avangin an tul in an buai tih sorkar pawh in a hriatpui a ni tiin khuallian Pu R. Lalzirliana chuan department dangte chu an mahni department bil leh kaihhnawihte an enkawl a, Police te rawh chuan an mahni nunna ngei pawh thap ngamin Dan leh Thupek kengkawhin mipui tan a sur a sa, a thim a var pawh thlu lovin an thawk thin a, an thutiama zahawm a ni tiin, tanla sauh sauh turin a ngen a ni.

Police mi leh sate hi ram venghimtu, mite tanpui tu an ni tih Mizo mipuite pawhin kan hre chho zel a ni tiin, Home Minister chuan tun hma chuan Police te chu naupang tih thaih nan ‘Police in a man ang che’ tih an ni thin, tunah erawh chuan mipui rilru sukthlek lo danglamin Police nihna dik tak mite tanpuitu, mite tana malsawmna thlentu, mi harsatna sutkian puitu an nih zia lang chho zelin mipuite pawhin an thlamuan pui tawh a, Police awm dan leh nihphung dik tak mi ten an hre tawh a ni, a ti a. Chutih rualin Police thenkhat mi chunga leng lap leh tawngkam mawi lo, chaltlai taka tawng thin an la awm chu pawi a tih thu leh an bula awm a hrehawm a, zahawmna a keng lo, in siam that a ngai a ni tiin Pu Lalzirliana chuan mahni hlawh phua khawsak thiam tur leh Ba an nei anih pawhin rulh that tur a ni, a ti a. Ba rulh that loh hi ngaihsamna chi khat a niin eirukna kawnga awlsam taka min hruailuttu a ni a ti bawk.

Uniform ha chunga ruih theih thil ti te chu ngaihdam mai mai chi an nih loh thu sawiin Pu Lalzirliana chuan traffic rules chungchangah taxi driver te an ziaawm sawt thu leh hma an sawn thu sawi bawkin hmeichhe scooty khalh thenkhat rules hre miah lo te rawh chu khauh taka siamthat an ngaih thu a sawi a ni.

Khual zahawm Pu Zorammawia pawhin kalkhawmte hnenah thu a sawi a bawk.

Vawiin hun hi Pu C. Lalremliana, President, MPSOA in a kaihruai a, ram tana thutiam urhsun taka neih a niin hruaitu hluite hnenah thil pek an hlan. MPSOA hi kum 1975 a din tan a niin Constable Rank atanga Inspector Rank thleng a huam a ni.

Chawhnu lamah rorel inkhawm neih a niin tlai lamah hruaitu thar thlanna MJA te buaipuiin neih a ni.