Vawiin khan Health Minister Pu Lal Thanzara hovin Mizorama Medical College din tur, Mizoram Institute of Medical Education & Research (MIMER) atan a din Advisory Committee chu Chief Minister’s Conference Hall-ah an thukhawm a.

Meeting ah hian Principal Secretary, Health & Family Welfare Department Pu Arun Goyal leh Advisory Committee member doctor rual te an tel a ni. Meeting ah hian Medical College dinna atan tun thlenga hma lak tawhna, hma lak mek te, hmachhawp neih te zau taka thlirho niin harsatna awm te sutkian nan hma lakna turte zau taka sawiho a ni bawk a. Meeting ah hian Dr. Lalbiakkima, Director, Hospital & Medical Education chuan tun thleng a hma lak tawhna leh hma lak mek te a tarlang.

Falkawn Referral Hopital tih changtlun leh khum 200 dah theihna tur hmalakna chu Medical College dinna atana thil pawimawh tak anih avangin hemi atan hian chak taka ruahmanna siam a hma lak a tul thu meeting ah hian sawi lan niin Advisory Committee chuan hei hi chak taka bawhzui nise tiin an rel. Falkawn a Mizoram Institute of Medical Education & Research dinna atana dilna leh DPR chu August thla khan Sawrkar Laipuia Ministry of Health & Family Welfare hnenah thehluh a ni tawh a, Sawrkar Laipui aiawh tirh chuan October thla khan Falkawn a tlawh a. Medical Council of India (MCI) dan in a phut ang a University affiliation atana dilna pawh Mizoram University a thelhluh tawh niin Mizoram University chuan inspection team an tirh hnuin kar hmasa lamah MZU Academic Council thukhawm chuan MIMER din remtihna leh affiliation chu an pe a ni.

Ruahman dan chuan MIMER hi nakkum a tan tum a ni a, a tirah chuan zirlai 50 nen bultanin, a kum khat naah subject pathum – Anatomy, Biochemistry leh Physiology te zirtir tum a ni. Falkawna din tur MIMER atan hian ram pum huapa medical infrastructure lamah sulhnu leh thiamna nei PSU, Hospital Services Consultancy Corporation chu Consultant atan pawm niin inremna thuthlung(MOU) chu Mizoram Sawrkar nen November ni 25 khan ziah a ni a, anni lam hian nakum January/February lamah first phase hna tan an tum a ni.

Tarlan tawh thin angin Mizorama Medical College din tur Central Scheme niin ‘Scheme for Establishment of new Medical Colleges by upgrading District/Referral Hospital’ hnuai a kalpui tur a ni a. He ruahmanna hnuaiah hian ram pumah medical college thar 58 din tum a ni. Medical College dinna atana senso za zelah 90 chu sawrkar laipui tum tur niin za zelah 10 chu state sawrkar-te tum tur a ni thung a. MIMER dinna atana sum mamawh zat chu cheng vaibelchhe 189 vel a ni.

Ram pumah Medical College thar 58 dinna atan Sawrkar Laipui in a din Technical Expert Committee chu November ni 13 khan an thukhawm a. He meeting ah hian Dr. Lalbiakkima, Director, Health & Medical Education leh Dr. Eric Zomawia, Deputy Director te an tel a ni.