Chief Minister Pu Lal Thanhawla chuan ‘Kut hi intih hlimna leh nuam siamna hun a ni a, nawmsip bawlna leh nawm chenna a nilo’ a ti. He thu hi vawiina Tuirial Airfield a Tourism Department in a huaihawt, ni thum chhung awh tur “Thalfavang Kut 2014’ a hawnnaa a sawi a ni.

Chief Minister chuan Tourism Department in Thalfavang Kut a buatsaih chu lawmawm a tih thu a sawi a. Kut hi a tam thei ang ber hman hi a tha a ti a.Thalaite tana khawvel thar siamna kawngah khawvel thang zel mila kalpui chu sorkar duhdan a ni a ti a. Hnamdang ten Mizoram hi mawi an ti hle a ni tiin, a ti mawi zual tu chu a chhunga chengte hi kan ni a ti a, chuvangin kan tihtur leh tih loh turte hria a, nachang leh hmangchang kan thiama kan hriatte pawh a tul hle a ni a ti. Kut hi midangte leh khualzin mite hip thei zawnga kan buatsaih a tul thu sawiin, Pu Hawla chuan Hmarchhak bialah Naga ten siamchawp ‘Horn Bill Festival’ an siam hian midangte hriat an hlawh phah nasa a, keini pawhin Kut tam thei ang ber leh lian thei ang ber kan buatsaih hi a tha hle a ni a ti.

Helai Tuirial Air field ah adventure sports hrang hrang kalpui thin hi sorkar chuan changtlung taka siam a duh tiin, Chief Minister chuan hmunhma tha zawka siam a ni ang a ti a. Flying club te pawh siam a duhthu a sawi bawk a.Kut hi mi tam zawkin an chhim ve theih lohna tura tih hlawhchham tumtu an awm chu a pawi hle a ni a ti a. Hetianga kan kal anih chuan sorkar pawhin a tih tur a ti ve ang a ti a. Bus leh Taxi permit te hi sorkar pek a ni a, harsatna siamtute dolet dan tur pawh ngaihtuaha kalpui zel a ni ang a ti.

Kuta chanvo nei zawng zawngte leh a chhimtu mipuite chu hlim tak leh nuam ti taka hmang vek turin Chief Minister Pu Lal Thanhawla chuan duhsakna a hlan a ni.

A vawikhatna leh abul tan nan Chief Minister hi Hot Air Balloonah chuangin, mipui ten man chawia an chuan ve theihna turin a hawng nghal bawk a. Hetih lai hian Pu R.Lalrinawma, Dy Speaker chu Muthi tlang atangin Parachute-in Air Field ah hian a rawn tum bawk a ni.

Hawnna inkhawm Chairman Pu John Rotluangliana, Tourism Minister chuan lawmna thu sawiin, a department tan chuan ni chhinchhiahtlak leh mellung pawimawh tak a ni a ti a. Kut hi central sorkar hnuaia Tourism Ministry in kum khatah vawi thum tal buatsaih thin tura thurawn a pek thu a sawi a. Tuna Tuiriala Thalfavang Kut buatsaih hi khualzinmite hip nan leh ram chhung leh pawn a mi tena min hriat theihna tura buatsaih a nih thu a sawi bawk a ni.

Pu Johna hian a vawi khatna leh a hmasa ber atan Power Hang Gliding a vailiam bawk a ni.

Thalfavang Kut neih chhung hian Aerosports te, Bike Circuit Racing te, Aero Modelling te, Painting Exhibition te, Air Rifles inkahsiak, Thal inkahsiakte, Hot Air Balloona chuan te, curtural show leh zai leh concert te neih a nih dawn bakah ei tur dawr hrang hrang leh handloom kutchhuak dawrte a awm bawk a ni.

Kut hawnna ah hian Minister Pu H. Rohluna, MOS Dr.B.D.Chakma leh Parliamentary Secretary Pu H.Zothangliana te an tel bawk a ni.

Attachment

  • Loading attachment...