Pi Lal Riliani, President, Indian Society on Tobacco and Health (Mizoram Chapter) chuan "Kan chhiatna tur hi keimahni bawkin kan fawmlut thin a; nun uluk zual a ngai" tiin vaihlo hman chungchang a sawi. He thu hi vawiina Champhai District Promoters' Club (CDPC)-in Rising Day an lawmna a hmanpuinaah a sawi a ni. He hunah hian Minister Pu Lalrinmawia Ralte chu Uaptu a ni a. Pu Lalhmingliana, EE, Minor Irrigation (Rtd.) chu Khualzahawm a ni a. He ni denchhen hian CDPC chuan Champhai District chhunga mi harsa zual thlan bikte hnenah blanket an hlan a ni.

Khuallian Pi Lal Riliani chuan Champhai District Promoters' Club-in an pawl din champha lawmnan ni harsa zawkte hnena thilpek an pe tur chu lawmawm a tih thu a sawi a. Indian Society for Tobacco and Health hmalaknate sawilangin, zuk leh hmuam tur hi tur nung a ni tiin, hrisel tur chuan thuawih a ngai a, kan tan a tha tur kan hriat te hi zawm a ngai thin a ni, a ti.

Vawiin hun a Uaptu Minister Pu Lalrinmawia Ralte chuan midangte tana luangral tur hrim hrima pawl din hi Mizoramah phei chuan a tamlo hle a ni tiin, chumi zingah chuan CDPC leh ISTH chu a tel a ni, a ti a. Phutlet nei lova tanpui ngaite tanpui a, chawimawi ngaite chawimawi chu a titheiten kan mawhphurhna vek a ni, a ti.

Champhai District Promoters' Club hi December ni 10, 2009 khan Champhai District chhunga zaimite tihhmasawm nan din a ni a. Vawiin an rising day lawmna, Champhai Venglai Community Hall-a neih hi Pu R. Lalrosiama, Vice President, CDPC chuan kaihruaiin, Pu B. Vanlalhruaia, President, CDPC chuan thu a sawi bawk a. Blanket semna hun hi Pu Lalthamawia Bolchhim an kaihruaiin, a vaiin mi 100 hnenah blanket hlan a ni.