State Election Commission thupek angin Chakma Autonomous District Council, 2013, inthlanna lo awm tur atana ruat Electoral Registration Officers-te chuan Draft Electoral Rolls ni 12.2.2013 khan an tichhuak a. He Draft Electoral Rolls hi Deputy Commissioner/District Election Officer, Lawngtlai office, Electoral Registration Officer office-ah leh Asst. Electoral Registration Officer office-ah te en theih tura tarchhuah a ni. He Draft Electoral Rolls-a sawisel duh neite chuan ni 13.2.2013 atanga ni 21.2.2013 thleng Electoral Registration Officer (ERO) emaw Asst. Electoral Registration Officer (AERO) te hnenah dilna form a bika siam hmangin dilna thehluh tur a ni.

Chakma Autonomous District Council hnuaia MDC Constituencies 20 a Draft Electoral Rolls tihchhuah ah hian vote nei thei mi 26,012 an awm a, heng zinga mi 13,084 hi mipa an ni a, 12,928 hi hmeichhia an ni.

He Draft Electoral Rolls sawiselna te chinfel hna hi ni 22.2.2013 - 28.2.2013 chhung hian neih a ni ang a, ni 1.3.2013 -12.3.2013 chhung hian Final Electoral Rolls buatsaih a ni ang. Ni 13.3.2013 ah Chakma Autonomous District Council Election 2013-a hman tur Final Rolls chu tarchhuah a ni ang. Hemi hnu hian General Election Schedule chu puan a ni ang. State Election Commission chuan Electoral Rolls felfai leh tha kan neih theih ngei nan Political Party, NGO leh mitinte chu State Election Commission leh Rolls siam hnathawktute zawng zawngte theihtawp chhuaha tawiawm turin a ngenin a sawm a ni.