State Level Fire Prevention Committee 2013 in vawiina Chief Minister Office Conference Rooma an Chairman Pu Lal Thanhawla, Chief Minister hova thukhawm chuan Mizoram pumah kangmei laka fimkhur hapta, Fire Prevention Week chu ni 18 - 23 February 2013 chhunga hman ni turin a rel.

Fire Prevention Week hi ni 19 February 2013 khian a hawnna neih nise commmitte chuan a ti a. Chairman Pu Lal Thanhawla chuan thal khawro a intan mek a, kangmei laka fimkhur hapta hman hun tura ruahman pawh hi duhai chuan a tlai lam tawh deuh a ni a ti a. Lo hal hun anih mai dawn avangin kangmei laka fimkhur a tulzia hi a thara kan hriat reng a pawimawh hle a ni a ti a. NLUP avanga tlangram lo neih nasa taka a tlak hniam thu a tarlang bawk a ni.

Committee chuan kum danga lo tih tawh thin angin kuminah pawh lo hal ni hnuhnung ber atan ni 15 March, 2013 khi a ruat a.Lengpui Airport bulhnaia khua te chuan chawhnu dar 3 hnu lamah chauh hal tura hriattir nise a ti bawk a ni. Kangmei chhuak thei laka hma la tha, state level-a district ti tha zual 3 leh, district levela khaw ti tha bik 3 thlan chhuah te hnenah lawmman siam leh nise tih a rel bawk a. A thlangtu tur atan tlawmngai pawl hrang CYMA, MUP, NSS, ASEP, AMFU, STAM leh SENVA te ruat an ni. Awareness tha siamna kawngah High School level a essay inziahsiakna buatsaih nise tiin, ni 15 March 2013 thleng Environment & Forest Office, Tuikhuahtlangah thehluh nise tih a rel bawk a.

Hengte bakah hian Committee chuan Phawngpui tlang bik chu kangmei laka humhalh tul bik anih thu tarlangin, hei hi state sorkar leh Lai Autonomous District Council ten hmalak dan tur siam ngei se a ti bawk a ni. Kangmei chhuah awlsamna bik, state level angin leh district tin ten chhinchhiahna siam nise committee chuan a ti bawk. Kum danga ram tikang thin tu nia hriat, ram leilung fa nilo, dan kalha duh lai hmuna chenna tur bawk khawh thinte chhinchhiah a, an chunga dan lekkawh nise a ti bawk a ni.