Vawiin chhun dar 12.00 khan State Election Commissioner (SEC) Pu C. Ropianga pisa-ah kumina term tawp tur, Chakma Autonomous District Council (CADC) inthlan hun tur puan a nih huna tluang taka inthlan buaipui a nih theihna turin meeting pawimawh tak neih a ni a. He meeting-ah hian CADC aiawhte leh he inthlanin a kaihhnawih tur State sawrkar official-te an tel a ni.

SEC Pu C. Ropianga chuan Governor-in inthlan hun tur a ruatfel veleh atanga harsatna awm lova an tih tur theuhte tluang taka an tih zar zar theihna tura inhmakhua a tul thu sawiin, harsatna awm theite leh a sutkian dan turte pawh ruahman lawk a ngaih thu a sawi. He meeting-ah hian CADC huamchhung bika Electoral Roll ennawnna kalpui dan tur rel a ni a; electoral roll ennawn turah hian hming belh a awm dawn lova, electoral roll-a hming chuangsa, paih ngaite enfiah a ni ang. Hemi bakah hian CADC inthlan buaipuina tura sum mamawh tur te, Electronic Voting Machine mamawh tur zat te, inkalpawhna kawngpui cheithat dan tur te, lirthei leh mihring duty tur ruahman dan turte leh thildang pawimawhte ngun taka sawiho a ni.