Vawiin 22.1.2013 khan Agriculture Conference Hall-ah Agriculture Department hnuaia Officer zawng zawng, AEO chin chung lam zawngte chuan kum thar atana inhlan tharna leh nikum 2012 chhunga an hmalakna leh kumin 2013 chhunga an hmalakna turte thlirhona an nei. He inkhawm, Agriculture Director Dr. C. Lalzarliana kaihhruaiah hian Mizoram hmun hrang hranga Agriculture Officers 80 lai an kal khawm.

Meeting-ah hian tun hnaia Mizoram State-in Agriculture Department hnuaia buh leh bal thar tha lawmman ‘Krishi Karman Award’ an dawn pawh pho lan niin he lawmman an dawn theihna chhan hi District tina Agriculture Field Officer leh Staff te leh loneitute thawhrimna te leh Sorkar hotute thahnemngaihna vanga dawn a nih thu te sawilan a ni.

He meeting-ah hian nikum 2012 chhunga buh thar punna atana hma an lakna – SRI, Improved Package of Practices, Hybrid Rice leh Improved Jhum-a hma an lakna te, thlasik buh an chin chungchang te, kum 2013-14 atana buh thar tam tura hma an lak dan tur te, Oil Palm an chin tharna tur hmun hrang hrang leh an inbuatsaih dan tur te leh an hmanraw hrang hrangte tangkai zawka hman dan tur an sawiho a. District Agriculture Officer-te pawhin an hmalak dan kim chang leh kum thara hmalak an tum dan te Power Point hmangin an entir bawk.

Agriculture Officer-te hian naktuk hian an pawl, Mizoram Agriculture Service Association (MASA) Annual Conference an hmang nghal ang.