Vawiin hian Mizoram pum ah naupang kum 5 hnuai lam zawng zawng Zenghri venna (Polio Vaccine) pek tan a ni a. He mi ni denchhen hian Civil Hospital Auditorioum, Aizawl ah Health Minister Pu Lalrinliana Sailo hovi'n Zenghri venna beipui hi tan a ni.

Inkhawmna hun tawi buatsaihah Health Minister Pu Lalrinliana Sailo chuan Mizoram ah Health care system a kan tih that avangin tun ah chuan retheihna avanga damdawiin awm harsatna te, inenkawlna te RSBY leh Health Care hmangin kan lo ti thei ta a, mi harsa leh chhumchhe zawk a kan ngaih te'n an chhawr tangkai hle a ni, a ti a. RSBY ah bik phei chuan tun kum 2013 atang hian BPL chauh ni thin kha APL, BPL ni lo tan pawh tih ve theih anih tawh dawn thu sawiin RSBY ah kan tih that em avanga APL hi ti thei kan ni a ti. Heng Sheme tha tak tak chhawr tangkai tur hian enrolment tih hun chhunga kan inziahluh ve a ngaih thu leh kan ngaipawimawh tlan a ngaih thu a sawi bawk. Nau an pian hlim atanga enkawlna dawn that a ngaih thu sawiin sawrkarin natna leng thei laka invenna chi 6, Hrawkna, TB, Khuhhip, Sentut, Zenghri, Sakawrekhrik vaccine te a thlawnin a pe thin a, hengte hi nu leh pa theuh ten kan ngaih pawih tlan theuh ngai a tih thu sawiin Kan infant mortality rate pawh hengte hmang hian nasa takin kan ti hniam thei a ni ati. Kawng hrang hrang ah Department lam te thawhho that tlanna tha a tih thu leh tanla chhunzawm zel turin a chah bawk.

Dr.K.Ropari, Joint Director of Health Services pawhin thu sawiin kan Minister finchhuahna leh tha hnem ngaihna te avangin thawktu te pawhin kan phur phah thin a, tun ah chuan Health Department hian hma kan sawn chho mek a ni, a ti. Tun tum Zenghri venna beihpui thlak mek ah hian Department lam chuan Booth 1298 a siam a, naupang kum 5 hnuai lam mi 1,29,843 pek tum a ni, a ti.

He inkhawm hi Dr.Lalbiakkima, Medical Superintendent, Civil Hospital in a kaihruaia, Dr.Sangthuama Ngente, Chief Medical Officer, Aizawl West in lawmthusawina neiin hun hnung a chang a, inkhawmna neih zawh hian Health Minister Pu Lalrinliana Sailo, Dr.K.Ropari, JDHS, Dr. Gordon Zohmingthanga, Mission Director, NRHM ten zenghri venna vaccine hi a dawng tur hnen ah an pe a ni.