Chakma Autonomous District Council (CADC) inthlanpui chu ruahman lawk angin tukin dar 7 atang khan mipuite'n tluang takin vote an thlak tan a; khawi hmun atang mahin thil duhawm lo lian tham thleng hriat tur a awm lo va. Chawngte Police Station-a inthlan kaihhnawiha thil felhlel awm nia hriat report lutte pawh chinfel nghal a nih thu Police thuneitute chuan an sawi.

CADC-a MDC bial 20 awmah Fultuli constituency-ah chuan High Court order-in inthlan hi stay rih a ni a; MDC bial 19-a polling station 66-ah inthlan hi kalpui a ni. He CADC inthlan atan hian voter hmeichhia 15087 leh mipa 15478, an vaiin vote nei thei mi 30565 an awm a. Tlai dar 3 thleng khan hriat theih chinah vote za zela sawmruk atanga sawmruk panga (60%-65%) vel a tla tawh a. Polling station thenkhat chu inbiakpawhna lam harsat avangin an chanchin hriat theih a ni rih lo.

Tun tum CADC inthlanah hian INC leh MNF te chuan bial awm zawng zawng (bial 20)-ah candidate dahin, BJP-in bial 19 an chuh a, Independent candidate 7 an awm bawk.

Vote thlak hun hi zanin tlai dar 5 thleng hawn a ni a. Hemi hnu hian polling station hrang hranga EVM-te chu Chawngtea SDO Civil office strong room-ah dah that nghal a ni dawn a; EVM-te hi naktuk zing lam hian Chawngte phurh thlen kim theih beisei a ni. CADC inthlana vote tlate hi April ni 24, 2018 (Thawhlehni) hian Chawngteah chhiar a ni ang.