Art & Culture Minister Pu P.C. Zoram Sangliana chuan vawiin tlai dar 3:30 khan Naltea Memory Chaltlang Branch YMA Library Computerisation chu Chaltlang YMA Hall-ah a hawng.

Mizoram puma recognised library 459 atanga library tha zual thlan chhuah 10 zingah Chaltlang Branch YMA Library Computerisation ti hmasa ber a lawmpui thu sawiin Minister chuan remna leh muanna hnuaiah chauh culture a par vul thei a kan hnamzia hi khawvel in Mizo min hmelhriatna ber a ni a ti. Tun lai khawvel hriatna changkan zelah computer hman thiam loh chu mimawl nihna a nih tawh avangin mitinin kan hman tangkai thiam a tul a, library changtlung zawkna tura computerisation hawn a ni thei chu lawmawm a tih thu a tarlang bawk. Hriatna leh finna zir thar zel tura lehkhabu chhiar uar deuh deuh a pawimawh thu te Minister chuan sawiin thangtharte kan infuih zel a pawimawh thu a sawilang bawk. Chaltlang Branch YMA Library Computerisation hi Raja Ram Mohan Roy Library Foundation (RRMRLF) sum senso a tih a ni a, Computer Set 2, TV leh DVD player te a keng tel a ni. Vawiin a Library Computerisation hawnna hi Branch YMA Vice President Pu Hnamhlunchhunga’n a kaihruai a Local Council, MUP, MHIP leh Mizoram Library Association hruaituten an hmanpui bawk.

Chaltlang Branch YMA Library ah hian puitling lehkhabu 3766 leh naupang lehkhabu 434 an nei a Library member puitling 184 leh naupang 125 an nei bawk a ni.