Mizoram sorkar flagship programme NLUP hmalakna ah chak zawka mipuiin engkim an hriat theih nan I&PR department chuan thapui an thawh dawn a. State pum huapa NLUP Media Cell enkawl tura ruat, I&PR officer 2 te bakah District tina IPRO zawng zawng te chu District levela NLUP hmalakna kawng tinreng ah an tel tawh dawn a ni.

District IPRO te nena thawh ho dan tur ngaihtuahin vawiin khan NLUP Implementing Board (NIB)Vice Chairman Pu P.L.Thanga hovin I&PR Director leh District IPROofficer te chu NIB Conference Hall-ah an thukhawm a. Pu P.L.Thanga chuan District IPRO te chu NLUP lo pian chhuah dan leh he project dinhmun hnuhnung te, NLUP atana Committee hrang hrang inkhai chhawn dan te hrilhfiah-in NLUP hmalakna ah hian mipui ten engkim chiang taka an hriat chu NLUP hlawhtlin nan a pawimawh thu leh dik taka engkim puanzar chu sorkar thuneitu sang berte duh dan a ni tih a sawi a. Mipuiin thudik an hriat theih nan he project thil tum leh a nihna dik tak te, a thawhna tura sum lo kal dan leh line department te hmalakna te chu IPRO ten an hriat bel hle a pawimawh a ni, a ti a. Hemi atan hian District IPRO te chu district level a committee hrang hrang ah an tel kim a, D.C leh line department te bakah district chhunga Press mite nen inpawh taka an thawh ho a tul thu a tarlang.

He meeting hi NIB Secretary Pu Zorammuana’n a kaihruai a. I&PR Director Pu Jim K.Chozah pawhin thu sawiin NLUP hmalakna ah Mizoram sorkar-in District IPRO te chhawr tangkai a tumna ah hian I&PR department chu theihtawp chhuah turin a inhuam reng a ni, a ti.