Art & Culture Minister Pu R.Romawia chuan vawiin chawhma khan Chaltlang Lily Veng MHIP building thar a hawng.

Pu R.Romawia chuan building thar neitu leh enkawltu tur Chaltlang Lily Veng MHIP ten tangkai taka an building neih thar an hman ngei a duhsak thu a sawi a. MHIP chu rethei leh chhumchhia te dawm kang tu, hmeithai leh fahrahte ngaihven a, tanpui ngaite tanpuitu an nih avangin Pathian rawngbawltu dik tak an ni, a ti. Mizo hmeichhiaten nasa takin hma an sawn a, eizawnna kawng thu ah pawh chhungkaw eizawngtu bera tang hmeichhia engemawzat an awm tawh, Minister chuan a ti a. Hetih lai hian Mizo mipate erawh tan an lak thar a ngai a, hmeichhiain an mamawh ber chu himna a ni a, ei leh bar zawnna kawngah leh taksa thuah himna pe theitu, chhungkaw pa nih tling, rinngam leh belhtlak ni tura an inzir a ngai a ni, a ti bawk. 

Chaltlang Lily Veng MHIP President Pi K.Lalliantluangi pawhin thu sawiin an veng MHIP tan chuan mel lung pawimawh tak,  hawrrawppuia ziah tlak a ni, a ti a. Hmeichhiate chawikanna kawnga MHIP te hmalakna hriatpuia, sawrkarin a thlahthlam ngailo chu lawmawm a tih thu a sawi bawk a ni. 

Chaltlang Lily Veng MHIP building thar hi NEDP sum hmangin UD&PA Department kaltlanga sak a ni a. A sakna atana sum ruahman chu cheng 15,95,300 a ni. MHIP Building ding sa chungah vertical extention tiin chhawng khat sak belh a ni a. Kumin May ni 7 khan thawh tan a ni.