Vawiin khan Mizoram Science Centre, Berawtlang-ah Chief Minister Pu Lal Thanhawla chuan "Innovation Hub & Space Education Centre" chu a hawng. Pu Lalsawta, Minister of Planning Department (Science & Technology) chu khualzahawm niin, Mizoram State Planning Board Vice- Chairman Pu H. Liansailova pawh an tel a ni.

Khuallian Mizoram Chief Minister Pu Lal Thanhawla chuan National Council for Science Museums (NCSM), Ministry of Culture, Goverment of India leh Directorate of Science & Technology-te thawhona leh thahnemngaihna rah Mizoram mipuite leh abikin thalai leh zirlaite tana Centre tangkai tak ni tur hawn a ni thei ta chu lawmawm a ti a. He 'Innovation Hub & Space Education Centre' a puitlin theih nan a ngawrh taka beitu Science & Technology leh Planning lama thawktute chungah lawmthu a sawi bawk. Chief Minister chuan kawng hrang hrangah thalaite hmasawn theihna turin sawrkarin hma la thin in; ram tana mi tangkai leh chhuanawm, ram innghahna tlak dik tak an nih theih nan an thiamna leh talent te haichhuah sak a tihhmasawn sak mai bakah an tuina kawng an zawh ngei theih nan remchanna siam sak zel chu sawrkar duh dan a nih thu a sawi a. Infiamna lamah te, skill development te, entrepreneurship lamah te leh competitive exam hrang hrang hmachhawn thei tura hmalakna ten rah a chhuah zel thu a sawi.

Chief Minister chuan vawiinah Science & Technology lama tui te tan leh ngaihvente tan hmasawnna ruangam tha leh changtlung tak hawn tak pawh thalaite tana khawvel thar buatsaihna kawnga rahbi pawimawh tak a nih thu leh lawmawm a tih thu a sawi a.Innovation Hub & Space Centre chu zirlaite leh a tlawhtu zawng zawng ten neitu rilru pu chunga an hman tangkai a, thianghlim taka vawng tlang a dimdawi taka an enkawl vek turin a chah.

Chief Minister Pu Lal Thanhawla chuan ram hmasawnna duh tak tak ten thahnemngaihna nen mahni zawn theuh a tih tur tih a ngaihtuahna tha zawk te nei a hmalak chuan thil huphurhawm a ngaihte pawh a lo hlawhtling thei thin a ni, a ti a. Mi thawk thalo karah sawrkarah leh mipuiah taima tak tak an awm avangin Mizoram pawhin economy lamah hma a sawn a, a sawn mai nilovin India state economy thang chak ber pali zinga thlanchhuah a nih tak thu a sawi. Heng zawng zawng atan hian thawhhona tha a pawimawh thu Chief Minister chuan a sawi a ni.

Khualzahawm Minister Pu Lalsawta pawhin thu sawiin, Innovation Hub & Space Education Centre hawn avangin state-in science leh technology khawvelah bung thar a kai a, science thiamna ah Mizoramin rual a pawl ve tawh viau a ni, a ti. He hmun hi a bik takin a hmang tangkai ber turte chu zirlai an nih tur thu a sawi a. Kum 2/3 kalta atang khan Science & Technology hian mite hmelhriat a hlawh ta hle chu lawmawm a tih thu a sawi a. Ram hmasawn nana rilru leh ngaihtuahna senga thahnemngai taka thawk turin he ‘Innovation Hub & Space Education Centre' thar hawnnaa kalkhawmte a fuih bawk. 

He Innovation Hub & Space Education Centre  hawnna inkhawm hi Dr. R.K. Lallianthanga, Chief Scientific Officer chuan a kaihruai a. Hun rei tak atanga Mizoramah ngei hian awm ve se tia kan lo mitthla thin Centre pawimawh tak, Mizoram sawrkar hruaitute leh Science & Technology a thawktute thawhrah a taka hmuh theih a lo ni ta chu lawmawm a tih thu a sawi. Programme hi Pu F. Lalramchhuana, Sr. Curator, Mizoram Science Centre chuan lawmthu sawiin a khar a. Planetarium show enho nghal bawk a ni.

Innovation Hub & Space Education Centre sakna leh a chhunga khawl leh hmanrua hrang hrangte atan hian NCSM chuan cheng nuai 386 a seng tawh a. Heng senso zawng zawng hi NCSM, Govt. India chuan a tum vek a ni. NCSM chuan Innovation Hub chu kum thum chhun enkawlna tur a tum tel bawk ang. A sak hna hi Mizoram PWD hnuaiah thawh niin, Innovation Hub bik hian ram metre 300 bial a awh a, Space Education Centre hian metre 113 bial a zau a ni.

Innovation Hub hi a bik takin High School leh Higher Secondary School zirlaite, Polytechnic, leh ITI zirlai ten tangkai khawl leh thil hrang hrang siam dan taka an hman leh zir theih nana duan a ni a. Space Education Centre hi zirlai leh a tlawhtu mipui ten van lam chanchin an zirna tur leh hriatna tizautu tura siam a ni. 

Innovation Hub-ah hian zirlaite hman tangkai turin Physics, Chemistry, Biology Mechanical, Electrical & Electrinics Laboratory te a awm a. Lecture Room te awm bawkin, Innovation Resource Centre, Thod-Phod Jod, Robotics Section, 3D Printer, Hall of Fame leh Multimedia Kiosk te a awm a ni.

Space Education Centre hi 8 metre diameter dome niin mi 51 thut lenna a ni a, film show pariat leh planetarium show 4 chhuah theih a ni. Planetarium hi vawikhat show ah zirlai tan cheng 30 leh mipui vantlang tan cheng 50 chhiar a ni.