Vawiin chawhma dar 11 khan Champhai DC Conference Hall-ah DC Pu Vijay Kumar Bidhuri kaihhruaina in kumin Faina Hapta hman dan tur rel ho a ni.

Pu Lalenglawma Pakhuangte, District Urban Development Office in he faina hapta hman dan tur ruahman sa hrang hrangte a sawi hnuin hetiang hian Champhaiah chuan programme hman dan tur duan lawk a ni. Faina hapta hi October ni 3-7, 2011 ah hman tur a ni a, a hawnna hi ni 3.10.2011 zing dar 7:00 ah CHANEM kawtah neih tur niin Scout & Guide an hnatlang ang a, hnatlang turte hi DC Pu Vijay Kumar Bidhuri chuan a vailian (flag off) dawn a ni.

Faina hapta chhung hian Champhai Town area chhunga VC leh YMA te an veng chhung tifai theuh tura beisei an ni a. Champhai Town area chhunga veng fai inelna VC area tinah siam tur a ni a, lawmman leh certificate 1 - 3 na pek tur a nih bakah faina kawnga hma la vengte hnenah consolation prize siam a ni bawk ang. Hei bakah hian thingpui dawr fai inelna lawmman siam a ni dawn a, endiktu tur atan MJA Champhai leh Sub-Hqrs MHIP te ruat nghal an ni. Kumin a Faina Hapta hmanna atan hian pawisa a beitham deuh avangin zirna in leh pisa te tan erawh chuan lawmman siam a ni dawn lo thung a, mahni office leh sikul theuhte tifai turin hriattir an ni thung ang.

Faina Hapta kharna hi ni 7.10.2011 chhun dar 12 ah I&PR Auditorium CHANEM building ah neih tura ruahman a ni a, he hunah hian Pu T.T. Zothansanga, Champhai North bialtu MLA chu khuallian a ni ang. Vawiin thutkhawmah hian October ni 2 atanga November ni 4 chhunga Sanitation Festival (Swachhata Utsav) hman dan tur pawh rel nghal a ni a. Pu K. Zohmingliana, EE, PHE chuan he hun hman dan tura rawtna hrang hrangte a tarlang a ni.