Vawiin chawhma dar 11 : 00 khan D.Cs Conference Room Saiha-ah Mizoram Remote Sensing Application Centre (MIRSAC) in Science thiamna hmanga Saiha District chhung ram hman dan tur an buatsaih “Atlas of Integrated Land Use Planning for Saiha District” tih chu District Bawrhsap Pu Kunal IAS chuan a tlangzarh.
Pu Kunal IAS chuan thu sawiin Saiha District zirchianna neia action plan mumal tak siam peih ani ta hi a ram leilungfate hian hmang tangkai thei se a duh thu a sawi a, tunlai khawvel thangmekah planning pawimawhzia sawiin sawrkar pawhin mipuite hmasawnna turin hma nasa tak a la a, hei hi mipui ten kan thawhpui thiam a pawimawh ani tiin NLUP chungchang ah pawh ruahmanna fel tak leh tum mumal tak kan neih a ngai ani, a ti bawk. DRDA kaltlanga khawtlang hmasawnna tura ruahmanna chi hrang hrang leh Scheme hrang hrang te tihlawhtling tur pawh in mipui ten a thil tum leh a kalphung kan hriatchian a pawimawh ani, ati a, ram hmasawnna tur chuan khawtlang hruaituten mipuite awmze nei taka kan zirtir a ngai ani, ati bawk. DRDA kaltlanga mipuite hmasawnna tur kawng hrang hrangte zirtir tur a hmalak a tum thu a sawi bakah kalkhawmte hnenah tangkai taka he ATLAS hi hmang turin a chah a ni.
He ATLAS tlangzarh inkhawm hi Pu K.Lalrammuana, Senior Scientist, MIRSAC chuan a kaihruai a, ATLAS bu hi NLUP norms mila buatsaih a nih thu leh NLUP atan leh nakin zela development hmalakna chi hrang hrang atan hman zui reng theih anih tur thu a sawi ani. Pu H.Lalhmachhuana, Scientist, MIRSAC chuan Technical Report pe in Remote Sensing and GIS technique hmanga plan an siam dante Power Point Presentation hmangin a entir ani.He Atlas hi Remote Sensing leh GIS hmanga buatsaih ani a, Thlalem thlalak-IRS, LISS-III,LISS-IV, Cartosat-I leh Quick Bird te hmangin Saiha District chhunga ram hman dante, ram leilung awmdan leh awih dante, a lei that dante, inkalpawhna kawng awmdante ruahtui tlak dante leh lei chhung leh pawna tui awm dante zir chian anih hnuah GIS hmangin ram leilung behchhana ram hman dan tur ruahmanna Atlas ah hian tih lan a ni.
Atlas bua a lan dan in Saiha District chhung ah - WRC Cum Pisciculture atan 31.61 Sq km, Terrace atan 38.23 Sq km, Agro-Horticulture atan 64.04 Sq km, Agriculture leh Horticulture atan 58.52 Sq km, Silviculture/Pastureland atan 137.86 Sqkm leh Afforestation atan 100.94 Sq km a awm thu tarlan a ni.
Atlas Bu tlangzarh inkhawm ah hian Saiha khawpui chhung veng hrang hrang V.C. te, Tlawmngaipawl hrang hrang hruaitu te Department hrang hrang hotute leh Chanchinbu mite an kal tha hle a ni.
