Vawiin khan Champhai DC Conference Hall-ah Jal Kranti Abhiyan - tui harsatna tikiam tura khawtlang hruaitute leh Sorkar hnathawktute bakah tlawmngai pawl te tangho a hmalakna thar Sorkar laipuiin a duan chu - Champhai District-a kalpui dan tur ngaihtuahin District Level Committee koh a ni.

Vawiin meeting-ah hian DC aiawhin Pu Pachhunga, SDO (S) chuan kaihruaiin, Member-Secretary Pu CC Lalchuangkima, Project Director, DRDA chuan Jal Kranti Abhiyan chungchang sawifiahna a nei a. He hmalakna hnuaiah hian district tinah tui harsat zualna bik khaw pahnih thlanchhuah a, 'Jal Gram' a vuah tur a ni a. Heng khua ahte hian tui dah khawlna tha leh tui renchem tak leh tangkai zawk a hman dan te ngaihtuah pui tur a ni. Hemi atan hian pawisa hranpa dah a ni lova, Sorkar laipui atanga scheme hrang hrang kalpui mekte nen tangkawpa hmalak tur a ni a. He hna kalpui a, enfiah tur hian Village Level leh Block Level Committee din tur a ni bawk.

Vawiin thutkhawmah hian Jal Gram tur thlan dan tur duan sa chu zir ho in, khua pahnih thlan tur chu an ngaigtuah a. Line Department tin ten Sorkar laipui tanpuina atang an hmalak mekna leh he scheme thar nen an inthluzawm theih dan tur te sawiho a ni.

Champhai District Level Committee on Jal Kranti Abhiyaan-ah hian EE PHED; EE Minor Irrigation Dept; DAO; DLAO; Dist. Soil & Water Conservation Officer leh Medical Superintendent bakah tlawmngai pawl thlan bik aiawh te chu member a ruat an ni.