Vawiin khan Parliamentary Secretary Pu KS Thanga chuan Champhai District chhunga Zirlai Tithate chawimawina hun, Champhai Venglai Community Hall-a buatsaihah khuallian niin a hmanpui a. "Mite tana kan hlutna leh rawng kan bawl reng theih nan nitin kan hriatna kan tizau belh zel tur a ni", a ti.

Zirlai tithate chawimawina hun, MZP Champhai Headquarter buatsaihah hian Parliamentary Secretary chuan chawimawina dawngte chu a lawmpui thu sawiin, tun an dinhmunah duhtawk lova, ram pum huap zirlai zawng zawng el pha turin a fuih a. Khawtlang leh kohhranah zirlai tibahlah thei turin zirlai nih chhung chuan inhman a fuhloh theih thu sawiin, theih tawp chhuah a zirna lama insawrbing a, an thawhrimna rah hna tha an neih hunah khawtlang leh kohhran tan tangkai zawka thawhna hun la awm tur thu Pu KS Thanga chuan a sawi a ni.

Khuallian chuan ram hmasawn tur chuan hriatna leh thiamna a pawimawh thu sawiin, tu tan pawh zirna hi a chawl lo tur a ni, a ti a. Kan kum a tam vanga rilru chawlh tir kan tum mai thin hi kan ram than mawh bawk pakhat a ni tiin, hriat belh zel tum tur a ni, a ti a. Champhai chu ramri dep a awm anih avangin sumdawnna kawng awlsam tak inchhawp a awm theih thu tarlangin, sumdawnna lamah pawh thiamna nei chu an hlawk zawk nge nge thin a ni, a ti bawk. Vawiina chawimawina an dawn chu tiphurtu ni se a duh thu leh, zirlai zinga duh anga hlawtlinglo a inhria te pawh beidawnglo a zir trang trang zel zawk turin Parliamentary Secretary chuan zirlai kalkhawmte chu a fuih a ni.

Vawiin hian kum 2015-2016 HSLC exam-a zirlai 51 (Distinction leh 1st Division) a pass, HSSLC exam-a Distinction-a pass zirlai 23 bakah Champhai atanga PhD Degree dawng mi 5; IAS officer pakhat, MCS officer pakhat leh MFAS officer pakhat hnenah chawimawina hi hlan a ni.

Chawhnu lamah C. Lalthazuala, Inspector, Taxation Department atangin Career Guidance Programme neih a ni.