1429-2024-2025

Champhai, 3rd August 2024: Vawiin khan Champhai Addl DC Pu K. Zorammuana chuan Zorun Events te buatsaih 1st International Mizoram Trade Expo chu Vanlallawma Indoor Stadium (VANIS), Champhai Kahrawtah a hawng.

He hunah hian Pu K. Zorammuana chuan a Champhaiah a tum khatna atan International Trade Expo buatsaih a ni chu lawmawm a tih thu a sawi a. Trade Expo chu sumdawnna kawnga ngaihtuahna thar min petu, Mizo sumdawngte leh hnamdangte inkara inlaichinna tha siamtu ni se a duh thu a sawi bawk.

Champhai Addl DC hian Mizoram awmna chu hmun pawimawh tak, Myanmar leh Bangladesh ramri ten an hual vel a ni, a ti a. Kaladan Multi-Modal Transport Transit Project (KMMTP) a puitlin hunah phei chuan khawmual leh tuipui kaltlangin Asia chhim chhak ram te leh Bangladesh tan India ram kawtchhuah a la ni thuai dawn a, he hun atan hian tun atanga inpuahchahna kalpui a ngai a ni, a ti bawk.

1st International Mizoram Trade Expo hi August ni 5 - 24 chhung hian Vanlallawma Indoor Stadium (VANIS) Ground Floor-ah neih a ni dawn a. Expo-ah hian ramchhung leh pawn atangin sumdawng engemaw zat an fuan khawm a,  chawhma dar 10:00 atanga zan dar 08:00 thleng mipuite tlawh theiha hawn thin a ni ang.