1430/2024-2025

Dated Saitual, the 3rd August, 2024: Tukin dar 10:30 am khan Mizoram Assembly Speaker Pu Lalbiakzama, Chalfilh bialtu MLA ni bawk chuan Phullenah Chalfilh bial MLA Office a hawng.

He hunah hian Speaker chuan MLA chuh tura a rilru a buatsaih tan atanga a duhthusam pakhat, Bial chhunga MLA pisa dah a tihlawhtling thei chu lawmawm a tih thu a sawi a, amah vote tu mipuite chu a hlawhtlinna tura pawimawh tak an nih thu a sawi bawk a ni. MLA pisa chu bial mipuite ta a ni a, mipuite avanga he pisa hi piang thei chauh a ni tih a sawi a. Speaker chuan Chalfilh Bial pisa pui nihna phurchhuak tur khawpa a lo tangkai theihna turin tanrual puiah mipuite chu a sawm nghal a ni.

Mizoram sawrkar thar chu mipui sawrkar a nih angin MLA zawng zawngte mahni bialah a tam thei ang bera awm tura beisei an nih bakah kawng tinrenga mipui ban phak a inchhawp hnaih hi sawrkar rilru a ni tih speaker chuan a sawi a, bial chhunga MLA pisa neih chu hemi kawnga an thil tum tihlawhtlingtu a nih theih thu a sawi. Khaw chhak chan lam, langa Aizawl dawr phaklohna huamchhunga hmun laili ber a nih avangin Phullen hi Bial MLA pisa hmun atan an thlang tih a sawi a, duhsak bik khua nei loin bial mipuite tana tha ber tura an ngaih avanga he hmun hi thlang an ni tih a tarlang.

He pisa hawn tharina a tum bulpui ber chu bial mipui ban phaka indah a ni. Sawrkar kalphung atana ruahman chu mipui ban phaka awm maiah a tawp lo a, mipui vawn tura bante theh chhuak a, va vuantu leh an mamawhte tihsak tura “Ban a kaih Policy” hmanga mipui khaichhuah a ni tih Speaker chuan a sawi a. Chumi kawngah chuan mi harsa leh mi te ber pawh an harsatna hriatpui tumin, chutiang ti tur chuan mipui hnaih thei ang leh mi nawlpuite ngheng phaka an awm a ngai a ni. He pisa hian bial mipui ten Aizawl dawr tura an hun, tha leh sum tam tak an sen thin kha a su kiang dawn a ni tih speaker chuan sawiin, he pisa hi MLA chauh hman tur ni loin, bial chhung mi ten bial tana hnathawhna hmun ‘Bial mi te tana INPUI’ a ni dawn a ni tih a sawi bawk a ni.

Chalfilh bial hi bial dangte tan pawha entawntlak ‘Model Constituency’ a siam a duh tih Speaker chuan a sawi a, Central leh State sawrkar department hrang hrangte dawrin project engemaw zat thehluh a ni tawh a, State department sum piah lamah Central Scheme leh Project chi hrang hrang atanga sum hai luh tumin he bial tan hian theihtawpin tan an la tih sawiin, mipuite ruahmanna (proposal) thehluhte pawh a changtu Department lamah theihtawpin an nawrzui thin a, an hlawhtlin theih nan Speaker chuan an beih zel tur thu a sawi.

Pu Lalbiakzama chuan MLA Local Area Development Scheme (MLA LADS) hi mi zawng zawng tana tangkai tur hmasawnna ruhrel (asset) inhman tawm theih tur thil dinna tur a ni tih a sawi a. Awmze neia kalpui turin ruahmanna fel tak duan a ni a, a hlawhtlinna tura pawimawh ber chu bial mipuite an ni a, beiseina sang tak nei chungin a hlawhtlinna tura mawhphurhna mipuite kutah a hlan tih a sawi. Speaker chuan he Bial MLA pisa hi Chalfilh Bial mipui tan malsawmna tam tak thlentu a lo nih ngei a beisei thu a sawi bawk a ni.

He hun hi Chalfilh Central Block President, Tv C. Lalremruata chuan kaihhruaiin, hunserh hi Pastor Lalbiaknungan a hmang a. Pu Lalrinawma chuan inhmelhriattirna hun hmangin, Office report hi Pu Lalhruaichhunga hnen atanga ngaihthlak a ni bawk. Speaker leh bialtu MLA ni bawk Pu Lalbiakzama, bakah hian Pu R. Lalthansanga, Pu C.Lalremliana (MPS), PS to Speaker, Pu Lalduhawma te pawhin thu an sawi a. Pu Lalthangmawia chuan lawmthu sawiin he hun hi a khar a ni.