2871/2023-2024

Champhai the 29th November, 2023 - Mizoram Legislative Assembly Inthlanpui, 2023-a Champhai District huamchhunga Assembly Constituency pathuma vote tlate chhiar tura inpuahchahna kal zelah vawiin khan Political Party te Counting Agent-te, Candidate Agent-te leh media te tan Champhai DC Conference Hall, Keifangtlang-ah Training Program buatsaih a ni.

He hunah hian Champhai DC & DEO, 24 Champhai South AC RO ni bawk Pu James Lalrinchhana, Champhai Addl DC & 23 Champhai North RO Pu M. Misael, Champhai PD, DRDO & 25 East Tuipui RO Pu Lalrinawma leh official dangte telin, Champhai District MJA te leh Politicial party hrang hrang aiawh Counting Agent-te an tel a ni.

Champhai DC & DEO Pu James Lalrinchhana chuan vote chhiar chu inthlan kalpuinaa a hmawr bawkna leh inthlan hlawhtlinna lan chhuahna a nih angin political party aiawhte leh media-te chu an mawhphurhna leh chanvo te chiang taka an hriat a tul a ni, a ti a. Champhai District huamchhunga Assembly Constituency pathuma vote tlate chhiar turin inpuahchahna uluk leh felfai taka kalpui anih thu sawiin, ECI ina tih tur leh tih loh tur a bituk te fimkhur taka zawm theuh tur leh Counting Centre pawh a hun taka thleng kim ngei turin a ngen a. MLA Inthlanpui, 2023 neih mek chhunga Champhai District-a leh Media-te Political party aiawhten Sawrkar tha taka an tawiawma, an mawhphurhna te tlin taka an hlenchhuah avanga lawmthu sawiin, election process tluang taka zawhfel ngei anih theihnan theihtawp chhuah tlang chhunzawm turin kalkhawmte a sawm a ni.

Vawiin training program hi Champhai Election Officer Pu Benjamin Zalawma Ralte in a kaihruai a. Pu Lalrinawma Khiangte, SDO (S) leh State Level Master Trainer ni bawk chuan Vote chhiar ni a Counting Agent te mawhphurhna hrang hrang a zirtir a, DIPRO Pi C. Lalremruati chuan Media te hriattur pawimawh Training a pe bawk a ni.

Ruahman lawk dan chuan, MLA Inthlanpui 2023-a Champhai District chhunga Assembly Constituency pathuma vote tlate hi December ni 3, 2023 (Pathianni) zing dar 8:00 a?angin DC Office, Keifangtlanga Counting Hall pathumah chhiar a ni dawn a. Bial tin tan counting hall hran theuh ruahman niin, counting hall tinah hian vote tlate chhiarna tur dawhkan 8 theuh a awm dawn a. Polling station hrang hranga vote tlate chu polling station number indawt dan zelin a tahtawla chhiar tura ruahman a ni a. Zing dar 8:00 ah Postal Ballot-a vote tlate chhiar tan tur niin, dar 8:30 atangin EVM-a vote tlate chhiar tan a ni dawn a, vote chhiar hi Round 4 ah zawhfel tum a ni a. Counting Agent-te hi Counting table tin zawnah party tin aiawh an thu dawn a ni.

Counting Day atan hian Media te hman tur Media Centre pawh Dc Office Ground Floor-ah ruahman fel tawh a ni a. A hmunah round tin result puanchhuah tur niin, hemi atan hian sound system bun fel tawh a ni a. Media te tana ECI in Authority Letter a tih chhuah chu vawiin khan sem chhuah nghal bawk niin, CCN Champhai Cable Network leh LCN Zokhawpui te chuan Inthlan result hi Live a tih chhuah an tum a ni.