2872/2023-2024

Dated Serchhip, the 29th November, 2023: Vawiin khan Serchhip DC Pu David Lalthantluanga hovin Mizoram Legislative Assembly Inthlanpuia Serchhip District huamchhung Assembly Constituency pathuma vote tla te chhiar dan tur leh inbuatsaihna chipchiar taka thlirho a ni.

Serchhip District chhunga Assembly Constituency pathum - Serchhip, Tuikum leh Hrangturzo tan Counting Hall pakhat theuh ruahman a ni a. Serchhip DC Conference Hall, DC Meeting Hall leh E-District te chu ECI kaihhruaina leh duhdan anga cheithat niin, peihfel thawkhat tawh a ni a. ECI duhdan angin Counting Hall chhungah hian CCTV vuah vek a ni bawk. Hall chhungah hian EVM a vote tla te chhiarna tur dawhkan pariat theuh siam a ni a, Postal Ballot chhiarna tur Serchhip Constituency tan dawhkan pahnih, Tuikum leh Hrangturzo Constituency tan dawhkan pakhat ve ve dah niin VVPAT chhiarna tur a bika hung hran (enclosure) pakhat dah vek a ni bawk.

ECI-in phalna a pek Authority Letter nei chanchinbu mite tan Counting Hall bulah Media Centre siamsak an ni a. Media Centre atang hian round tina vote tla chu mipuite hriat turin au rinna hmanga puan chhuah a ni ang. Candidate te leh an agent te pualin Public Communication Room siam a ni dawn bawk a. Media ten candidate te interview an neih pui theihna tur a bika hmun ruat Interview Booth/ Podium for Candidates siam a ni dawn bawk a ni.

Venhimna khauh taka kenkawh a ni dawn a. Official duty tur zawng zawngte leh candidate/counting agent te chu identity card keng theuh tura hriattir an ni. Phalna nei lo tan Counting Hall chhung hi luh khap tlat a ni a. Observer, RO leh ARO te chauhin Counting Hall-ah mobile phone an keng lut thei ang.

Counting Official te tan training vawikhat buatsaih a ni tawh a, a thawh hnihna hi December ni 1 ah nei leh tura ruahman a ni a. November 23 khan first randomization neih niin, December ni 2 ah second randomization, December ni 3 zing dar 5-ah randomization hnuhnung ber neih a ni dawn a ni. December ni 3, zing dar 8 ah postal ballot chhiar tan a ni ang a, EVM-a vote tla te hi zing dar 8:30 ah chhiar tan a ni ang.

Meeting-ah hian Serchhip SP Pu MS Dawngkima, RO, ARO, Sr.EE (P&E) leh DIPRO te an tel a ni.