2883/2023-2024

Champhai the 30^th November, 2023 - Mizoram Legislative Assembly Inthlanpui, 2023-a Champhai District huamchhunga Assembly Constituency pathuma vote tlate chhiar tura ruat Counting Supervisor leh Counting Assistant te tan Champhai DC Conference Hall, Keifangtlang-ah vawiin khan Training hnuhnung ber buatsaih a ni.

He hunah hian Champhai DC & DEO, 24 Champhai South AC RO ni bawk Pu James Lalrinchhana, Champhai Addl DC & 23 Champhai North RO Pu M. Misael, Champhai PD, DRDO & 25 East Tuipui RO Pu Lalrinawma leh official dangte leh Counting Supervisor leh Counting Assistant te an tel a ni.

Champhai DC & DEO Pu James Lalrinchhana chuan Counting Supervisor leh Counting Assistant tura ruat ten an mawhphurhna ngai pawimawha, training tha taka an attend thin avangin an chungah lawmthu a sawi a. Vote chhiar tura ruat te chu Counting chungchanga ECI Guidelines te leh Vote chhiar dan a practical-a an zir te chu uluk leh fimkhur taka inzir turin a chah a. Vote chhiarna dawhkan tinah Politcal party-te aiawh Counting Agent-te an thut ve tur thu pawh sawiin, Vote chhiar chungchanga Counting Agent ten an hriat chian duh leh zawhna an neihte ngai pawimawha, an hriatchian duh apiang hrilhfiah zel turin a chah a. Vote chhiar Ni ah ing dar 4:50 ah kim tura beisei an nih avangin an hriselna te lo inenkawl tha a, rilru fim leh zangkhai taka duty lo kal tura chahin duhsakna a hlan a ni.

Vawiin training program hi Champhai Election Officer Pu Benjamin Zalawma Ralte in a kaihruai a. Pu Lalrinawma Khiangte, SDO (S) leh State Level Master Trainer ni bawk chuan Counting Supervisor leh Counting Assistant te mawhphurna hrang hrang (duties & responsibilities) te leh Vote chhiar ni a form hman turte a sawifiah a, Pu Moses Lalfakawma Tlau, SDC leh Dr Vanlalnunpuii Ralte, SDC te chuan EVM-a vote tla chhiar dan inzirtirna practical training an pe a ni.

Champhai District-a Assembly Constituency pathuma vote tlate chhiar tur hian Counting Supervisor leh Counting Assistant 29 theuh ruat an ni a. Vote chhiar a duty tur te hi Vote chhiar ni ah hian zing dar 5:00 ah DC Office Keifangtlang ah in report tura hriattir an ni a. Zing dar 5:00 ah hian an duty na tur Computer hmangin thliar fel (randomize) a ni dawn a. Randomization a table nei lo (Reserve) te chuan Postal Ballot a Vote tla leh VVPAT slip an chhiar dawn a. Vawiin training ah hian Vote Chhiartute hriattur pawimawh zawng zawng dahkhawmna ‘Counting Process Handout’ sem nghal bawk a ni.

Ruahman lawk dan chuan, MLA Inthlanpui 2023-a Champhai District chhunga Assembly Constituency pathuma vote tlate hi December ni 3, 2023 (Pathianni) zing dar 8:00 atangin DC Office, Keifangtlanga Counting Hall pathumah chhiar a ni dawn a. Bial tin tan counting hall hran theuh ruahman niin, counting hall tinah hian vote tlate chhiarna tur dawhkan 8 theuh leh VVPAt Slip chhiarna tir “VVPAT Counting Booth” a awm dawn a. Polling station hrang hranga vote tlate chu polling station number indawt dan zelin a tahtawla chhiar tura ruahman a ni a. Zing dar 8:00 ah Postal Ballot-a vote tlate chhiar tan tur niin, dar 8:30 atangin EVM-a vote tlate chhiar tan a ni dawn a, vote chhiar hi Round 4 ah zawhfel tum a ni a.

Round tina Vote tla te hi Official Communication Centre, DC Office, Keifangtlang atangin Public Announcement System hmangin mipuite hriattur in puan chhuah a ni ang.