2058/2024-2025

Champhai, 13th Sepember, 2024 : Vawiin khan Champhai DC Conference Hall-ah District Consultative Committee, District Level Review Committee leh District Level Security Committee chu Bawrhsap Pu VL Remliana kaihhruaiin an thu khawm a. Kum 2024 April – June Quarter chhunga Champhai District-a Bank hrang hrang te hmalakna an thlirlet.

He hunah hian Champhai District chhunga Bank ten mipuite tana hlawk zawk leh tangkai zawka hna an thawh theih dan tur te sawiho a ni a. Quarter liam ta (April – June 2024) chhunga Bank hrang hrang te chet dan pawh thlirho niin, District chhunga Bank zawng zawng te CD Ratio (Bank-in pawisa deposit an hmuh atanga pawisa an puk chhuah tir zat) chawhrual chu za zela 67.41% a ni tih tarlan a ni a. He hun chhungah vek hian mipuite tan tum 22 zet ‘Financial Literacy Campaign’ neih a ni tih tarlan a ni bawk.

Thutkhawma tarlan danin Champhai District chhunga Bank-te hian Prime Minister Employment Generation Programme (PMEGP) hnuaiah loan 13, cheng nuai 70.26 an pe chhuak tawh a. Pradhan Mantri Mudra Yojana hnuaiah account nei mi 337 awm tawhin, he scheme hnuaiah hian loan cheng nuai 1791.55 pek chhuah tawh a ni. Housing Segment-ah loan cheng nuai 740 pek chhuah tawh a ni bawk. Social Security Scheme hrang hrang - Pradhan Mantri Jeevan Jyoti Bima Yojana (PMJJBY) hnuaiah mi 3585, Pradhan Mantri Suraksha Bima Yojana (PMSBY) hnuaiah mi 4301, Atal Pension Yojana (APY) hnuaiah mi 378 leh Sukanya Samriddhi Account (SSA) hnuaiah mi 128 te an inziaklut tawh bawk a ni.

Vawiinah hian thutkhawm danga rel tawh thin - Bank venhimna kaihhnawih leh District chhunga sum chet vel dan te pawh sawi ho a ni.

He meeting ah hian Pu. Lawmkima, Lead District Manager (Covener) Pu Dennis Vanlallura, DSP, Pu Ngulzathuama, SDO (Sadar) Pi Paununmuang, Manager RBI, District chhunga Bank zawng zawng Manager te, sawrkar department aiawhte leh member dangte an tel a ni.