Vawiin khan Champhai DC Pu H Lalengmawia hovin Champhai I&PR Auditorium-ah District Level Consultation Meeting on New Education Policy neih a ni a. He hun hi Pu C Lalbiakzauva, SDEO Champhai in kaihhruai a ni.

Champhai DC chuan India ramin zirna kawngah hmasawnna tur kan la neih tam em avangin mithiam leh mi fing engtin nge kan neih ang tih hi India ram policy a ni a, zirna hmasawnna atana programme a duan ang angte kan zawm a tul a, engtin nge mithiam kan chherchhuah ang tih hi kan ngaihtuah kalphung thar kan hman a tul tawh a ni a ti a. Sorkarin kalphung thar a duan CCE kalpui a nih mek lai hian a phenah zirtirtu inthlahdah tam tak an biru a, chung mite chu Zirna sang zawk Exam result-ah hailanin an awm thin a ni a ti a. High School result ah hian Elementary school te hian 50% mawh kan phur ve a ni tih kan hriat a tul a ni a ti bawk. DC Pu H. Lalengmawia chuan zirna hian mihring fing zawk leh chhawrnahawm zawkah min siam a tum a, kan hnam leh kan culture hre rengin kum tam tak lo kal leh tur mithla chungin he training hi kan hmang tur a ni, a ti a. India ramin zirna kawnga hma a sawn theihna turin kan ngaihdan hian kawngro a su ve a ni tih hriain rilru leh tihtakzetin discussion kan kalpui tur a ni a ti bawk.

Vawiin hun ah hian Champhai Distrcit-a zirtirtu leh mi sawm bikten kalkhawmin, chawhma lama Education Policy chungchang thusawi hrang hrang ngaihthlak a nih hnu in chawhnu lamah group-a inthenin New Education Policy chungchang chu Thupui hrang hrang sawihona neih a ni.

He meeting hi Pu Liansanga Pautu, SDEO Khawzawl, Pi K Lalsiamliani DPC (SSA) leh Pu H Lalhminghlua Dy DPC ten an telpui a. Pu C Rodala, DEO Champhai hnen atangin in lawmna thuchah ngaihthlak a ni.