28^th Mizoram Civil Services Sports (MCSS) Meet 2015 chu vawiin tlai khan Govt. Mizo High School Hall, Macdonald Hill, Zarkawt-ah Pu Hmingdailova Khiangte, Parliamentary Secretary hovin khar a ni.

Pu Hmingdailova Khiangte chuan Mizoramin infiamna hrang hranga Medal state dang atanga kan hawn theihna chhan pawimawh tak chu Inter Department Sports hi a ni a ti a. Sports a hnehtu nih ngawr ngawr lam hi tum ber anih loh thu leh department hrang hranga thawkte innelna leh inpumkhatna atan hetiang Sports Meet hi a tangkai a ni tiin kharna hunah hian thu a sawi a. Infiamna a ti thate hnenah lawmman a sem nghal a ni.

28^th MCSS Meet, 2015 hi 18^th – 21^st August, 2015 chhung neih a ni a.  Aizawla Sports Centre hrang hrangah hemi chhung hian inelna neiin vawiinah a kharna leh lawmman semna hun hman a ni. Sorkar office department hrang hrang te tel dan chu hetiang hi a ni.

Badminton -57 department atangin; Table Tennis – 41 department atangin; Chess – 39 department atangin; Carrom Board – 53 department atangin an tel.

MCSS&CA President Pu Zothanmawia, Director, Sports & Youth Services nibawk kaihhruai vawiina Annual Sports Meet kharna ah hian General Secretary, MCSS&CA Pu Rosangliana’n Technical Report a pe a. Sports Meet a discipline hrang hrang result puan leh lawmman sem nghal a ni a. Sr. Vice President, MCSS&CA Pu Lalrammawia’n lawmthu sawiin hun hnung a khar a ni.