Vawiin khan Champhai DC Conference Hall ah Champhai District Consultative Committee chu Chairman Pu Vanlalngaihsaka IAS Kaihhruaina hnuaiah neih a ni.

He Meeting ah hian Pu SP Sarmah , Chief Manager Lead Bank Office Champhai chuan kalkhawm te chu lo lawmin, Champhai District huam chhunga Bank hrang hrangte June Quarter tawp thlenga an chetthat dan (Performance review) thlir ho na neih a ni a. June ni 30 thlenga Champhai District a Bank hrang hrangte Credit Deposit ratio chu 58.40% a nih thu a tarlang a, hei hi bituk 60% a phak loh thu a tarlang bawk a ni. Hemi bakah hian Priority Sector tana loan pekchhuah ngaizat za a 40 (40%) chu khumin 86.66% a nih thu a sawi a, Agricultural Segment a loan pekchhuah ngaizat 18% ah 16.43% an pekchhuah tawh thu a tarlang bawk a ni. Chief Manager tun dinhmunah Champhai District ah Bank hrang hrang branch 22 an awm thu a tarlang bawk a, hei hi mi 5715 in Branch 1 intawm ang vel a ni a.(Mizoram pum ah chuan mi 5378 in Branch 1 intawm ang an ni). Hemi bakah ATM 9 a awm thu a tarlang bawk a ni.

Meeting chuan thingtlang leh hmun kilkhawr zawka mi tena Bank kalphung , loan lak leh sum peipun dan chungchang a hriatzau leh zirtirna pek a pawimawh thu a sawi bawk a. Bank ho ina Sawrkar Scheme hrang hrang heng PMEGP, DAY_NULM (SEP), MzSRLM te an kalpui dan chu thlirletna neih a ni bawka, MGNREGS beneficiary te tan Aadhaar leh Bank Account thlunzawm pawimawh thu te pawh sawiho a ni.

He meeting ah hian Champhai District huam chhunga Bank hrang hranga hnuaia Branch Manager te leh thawktute an tel tha hle a ni.