Vawiin chawhma dar 10:00 khan District Level PMEGP Exhibition, Champhai District chu I&PR Conference Hall, CHANEM Building-ah Pu K.Lianzuala, MLA, Mlzoram KVI Board Chairman chuan a hawng.

Pu Lalsawmzuala, MKVIB Chief Executive Officer kalhhruai hawnna Inkhawmah hian thu sawiin Pu K.Lianzuala chuan, KVI thil tum bulpui ber chu thingtlang mite eizawnna ngelnghet siam sak te, an kut themthiamna leh thildang hmanga an eizawnna tur buatsaih sak te hi a ni a. Hemi kawngah hian India ram state zingah kum 2008 leh 2009 khan Mizoram chu a ti tha ber niin lawmman pawh kan lo dawng tawh a ni, a ti a. Tuna exhibition kan buatsaih hi kumtina neih thin tura tih niin, Serchhipah state level buatsaih tawh niin district tina neih tura ruahman mek a ni, a ti.

Mizoram Sorkar flagship pogramme - NLUP chu a hlawhtlin theih ngeina tur leh dik taka mipui ten an kalpui a, eizawnna ngelnghet an neih theih ngeina tura kalpui tum a nih avangin duh anga kalpui chak theih a ni lo tih a sawi a. Mizo zingah kut tling lova sum dawn duhna thinlung nei kan awm thin hi a pawi hle a ni tih sawiin, Congress sorkar chu a zan kal mai mai dawn lova, tih tak takin ram siam that kawngah hma a la dawn tih a sawi bawk a ni. NLUP chu hlawhtling taka kalpui a nih theih nan kalkhawmte chu thawhpuiah a sawm nghal a ni. Tunlaiin khua a thal tak em avangin kangmei ven kawnga sorkarin hma a laknaah mipui ten theihtawpa kan tawiawm a tul tak zet tih a tarlang bawk a ni.

He inkhawma khualzahawm Pu Vijay Kumar Bidhuri, Champhai District Bawrhsap pawhin thu sawiin, KVI ten Champhai mipuite tan an hnathawh chu fakawm a tih thu sawiin, tuna exhibition neih pawh chu mipui ten an hlut thiam a tul thu a sawi a. Keimahni kutkawih ngeia kan thar chhuah leh kan siam chhuah te inngaihhlut sak thiam hi a pawiawh tih sawiin, chumi atan chuan mipui lam pawhin tuna exhibition-a pholan te chu tlawmngai leh thahnemngai taka lei sak turin a chah bawk a ni.

Inkhawm kalhruaitu Pu Lalsawmzuala, CEO, MKVIB chuan KVI hnathawh leh an tum bulpui sawifiahin, Khadi & Village Industry (KVI) chu Hnam Pa Pu Mahatma Gandhi ten an duanchhuah a nih thu a sawi a. Pu Gandhi-a ten thil te tham te atanga mipuite Intodelh chu an tum bulpui niin, KVI chuan thingtlang mite Intodelh leh chawikan chu an tum bulpui a ni, a ti a. He policy hi political party tin te pawhin an ngaih pawimawh theuh a ni a. KVI chuan mipuite hnena an eizawnna kawng kawhhmuh nan training peka, an thar chhuah hralhna thlenga buaipui chu an hnathawh a ni, a ti. Mipui ten loan an lak pawh tunah hian an programme hnuaiah chuan tribal te tan Margin Money pawh 35% laia tihsan a nih tawh thu a tarlang bawk.

He exhibition neih tan takah hian thil siamchhuah leh dehchhuah engemaw zat pholan a ni a. Naktuk hian I&PR Conference Hall-ah vek hian PMEGP awareness campaign neih zui leh a ni ang a, naktipah PMEGP Loan diltute tan Interview nei zui lehin, he exhibition hi tunkar zirtawpni thleng khian neih chhunzawm a ni ang.