23 Sector  Assam Rifles ten hnam inpumkhat hawi zawnga zin programme an buatsaih a kalte chu vawiin khan tluang takin an lo thleng leh ta a. Aizawl Sipai Lammual-ah Sports & Youth Services Minister Pu Zodintluangan a lo hmuak a ni.

 

 

Hemi puala inkhawm tawite ah Minister chuan India ram chu hnam chi tinreng, sakhua biak hrang leh mi in ang lo tak tak chenna ram anih avang hian ramri dep lam mite tana ramchhung nawlpui zin programme siam chu tangkai hle a a hriat thu a sawi a. Thalaite chu ram nghahfak nakin lawka ram hruaitu tur an nih avangin an khaw hawi tih zauh saka hriatna tam tak neih tir chu thil pawimawh tak a ni tiin hei hian midang leh an nu leh pa te hnen ngeiah pawh zirna tha tak a pechhawng dawn a ni a ti. Hetiang thil tangkai tak intlawhpawh programme an siam chungchangah hian Assam Rifles hotute chungah lawmthu a sawi bawk.

Inkhawmah hian Brig. S.K. Verma, DIG 23 Sector, Assam Rifles chuan thuhma sawiin programme an buatsaih dan leh a thil tumte a tarlang a. Zin hote atangin an zin dan tlangpui report ngaihthlak a ni a. Aizawl South II bialtu Col. Z.S. Zuala pawhin he hun hi a hmanpui ve a ni.

Tun tuma India chhimlam Bengaluru, Mysore, Trivandrum leh Chennai tlawha zuk kalte hi an vaiin mi 30 an ni a kum 14 - 18 inkar thalai rual an ni a. January 21 khan Aizawl an chhuahsan a ni.

Hun buatsaih chhan ang ngeiin heng thalaite hian an zinna hmunah hnamdang nunphung leh ziarang zirna te, hnamdangte nena ti ti hona hun tha tak te neiin hmun pawimawh leh hmingthang deuh deuh fan pui an ni.