Vawiin chawhma dar 10:00am khan Govt. Champhai College Seminar Hall-ah kar hnih chhung awh tur EDP Training chu hawn a ni.
Training hawnna inkhawm Pu C. Vanlalruata, District Village Industries Officer kaihhruaiah hian khuallian Pu Tinkhandala, Chief Executive Officer, Mizoram KVI Board chuan thusawiin, Champhai hi mi taima awmkhawmna a ni a, hetiang vangte pawh hian District dang atang pawh in nangmahni ah beiseina sang tak an nei a ni tiin hlawhtling tur chuan mi huaisen tan lo chuan hlawhtlinna hi neih a har a, loan te la ve mah se, tumruhna leh huaisenna an neihloh chuan thil tarn tak ngaihtuahna in an rilru a tibuai a, rulh theihloh te an hlau a, hetia an inngaihtuah chhung hian an sum chu a nilo lamah an hmang leh mai thin a ni, a ti a, huaisen taka kan hmalama thil awmte hmachhawn thei tur leh loan an lak chhan ang taka tih tak takna thinlung nena hna thawk turin a fuih bawk a ni.
CEO chuan an thilsiamte a hralhna tur lama lungngailo tura fuihin department lamin theihtawp an chhuah pui tur thu leh harsatna an tawh ang ang ah te rawn hreh lo turin a hrilh bawk a ni. Mizoram hi tun aia changkang leh nuam zawka siam turn tura fuihin Ram changkang tehna pakhat chu Per Capita Income san leh san loh hi a ni a, industry lama thil siamchhuah tam a pawimawh a, chumi atang chuan kan per capita income a sang anga, hei ai hian kan ram pawh a changkang dawn a ni, a ti. Khuallian chuan training a an thil zirte hlawk taka hmang tura fuih in he training kar 2 awh tur hi a hawng a ni.
Pu Lalnunmawia, Principal, Govt. Champhai College pawhin thu sawiin, hlawh hmu tlaka thawk turin a trainees te chu a fuih a, an thil tih reng rengah mahni hlawkna chauh ngaihtuah lova khawtlang hmasawnna pawh ngaihtuah a, kut tlinglova sum lakluh tum lo tur leh a tawp thlenga theihtawp chhuah turin a chah bawk a ni.
He hunah hian Pu K. Siamhlira SDIO DIC leh Pu K. Lalramlawma JEI te pawhin thu an sawi bawk a ni.
He training ah hian thupui hrang hrang hmangin mithiam thlan bikte leh Associate/Asst. Professor ten training an pe anga, tun thla ni 20 ah khar a ni ang.
