Tukin zing dar 7 khan Champhai Chenem tualah Faina Hapta (Cleanliness Week) 2011 hawnna inkhawm hman a ni.
He Hapta hawnna hi Pu Lalenglawma Pakhuangte, District Urban Development & Poverty Alleviation Officer, Champhai District in a kaihruai a. District Bawrhsap Pu Vijay Kumar Bidhuri chuan Week hi a hawng a ni.
Hawnna thu sawiin District Bawrhsap chuan kumtin in Faina Hapta hi hman thin a ni a, kuminah pawh he hun hi ngaih pawimawh a niin, Mizoram sorkar ruahmanna angin hman a ni leh dawn a, tluang tak leh hlawhtling taka he week hi hman anih theih nan duhsakna a hlan a. Mihring khawsak hona ah te, ram leh hnam changkang zia kan in enna pakhat chu kan fai leh fai loh a ni thin a. Ram ropui leh hmasawn te hi faina kawngah hian entawntlak an niin an ropuizia leh hma an sawn zia tilangtu ber pakhat chu faina hi a ni a. Chuvangin mihring hi kan khawsak hona leh kan bula mite nena kan chen hona ah te, Faina kan ngaih pawimawh loh chuan hmasawnna kawngah kan la hniam hle a ni tih a hriat a, hei mai bakah fai taka kan nun hian kan hriselna leh kan hnathawhna thleng pawha hmasawnna min thlentu leh mihring kan nihphunga min vawngtu leh min kaihruaitu a ni, a ti.
Champhai DC chuan faina chungchang sawi zelin kan sorkar chuan hengte hi hriaiin, faina lamah hma kan sawn a, tan kan lak theih nan kumtinin Faina Hapta hi kan intuaithar leh nana buatsaih thin. He Hapta kan hman turah hian a hun laiah chauh tanla lo in, englai pawhin kan bul leh a vel, kan chenna leh keimahni taksa, kan incheina te thlengin faina lamah tan kan lak reng a ngai a ni, a ti a. Sorkar hnathawkte chu Faina kawngah hmahruaitu leh mite zirtirtu ni tura tanla tura fuihin Bawrhsap chuan mipuite hnena Faina chungchangah awareness pechhawngtu leh zirtirtu tha tak ni turin a chah a. Faina Hapta a hlawhtlin theih nan theih tawp chhuaha tanla turin kalkhawmte sawmin a hnu zelah pawh faina kawngah inthlahduh mai lova mar pata kal chho zel tura fuihin duhsakna a hlan a ni.
He week hawnna ah hian sikul hrang hranga Scouts & Guides te veng hrang hrang tifai turin an kalkhawm a. District Bawrhsap chuan Scouts & Guides hnatlang turte hi a vai liam a ni.
