Vawiin chawhma khan Mizoram hmundang rualin Champhai District Final Electoral Roll, 2015 chu DC Conference Hall, Keifangtlangah tlangzarh a ni a, Champhai District chhungah vote nei 79550 an awm.

Electoral Roll tlangzarhna inkhawm hi Pu Sangdingliana, IAS, Champhai District DC leh District Election Officer ni bawk chuan a kaihhruai a, thusawiin DEO chuan, e-roll ennawnna hi kum tin kalpui thin a ni a, kumina e-roll ennawnna pawh hi nikum October atang khan kalpui tan niin sorkarin tlangzarh hun tura a ruata peihfel theih a ni chu a lawmawm hle a ni, a ti a, e-roll felfai tak kan neih theihna tura thawktu ERO, AERO, BLO, Political Party leh tlawmngai pawlte hnenah lawmthu a sawi a, Final Electoral Roll, 2015 hi a tlangzarh nghal a ni.

He hunah hian Pu Benjamin Lalzama, Election Officer chuan Special Summary Revision of Electoral roll neih dan tlangpui report a pe a, Champhai District-ah roll-a lut thar punna zat tamna ber chu Champhai South a nih thu tarlangin, an punna zat 2.36% chu India ram hmun dang ngaihtuahin a tam lo hle a ni, tiin a sawi.

Final Electoral Roll, 2015-ah hian Champhai District-ah vote nei 79550 an awm a, e-roll hmasa atanga a punna zat chu 1217 niin hei hi 1.55% a ni. Champhai District-a Assembly Consitituency-ah 23 Champhai South A/C-ah voters tam berin 17463 an awm a, e-roll hmasa atanga an punna chu 334 niin hei hi 1.95% a ni. 21 Lengteng A/C ah chuan e-roll tharah hian vote nei 16426 awmin an punna zat chu 109 (0.67%) a ni a. 22 Tuichang A/C ah chuan vote nei 15273 an awm a, an punna zat chu 234 (1.56%) niin, 24 Champhai South A/C ah chuan vote nei 16164 an awm a, an punna zat chu 373 (2.36%) a ni. 25 East Tuipui A/C ah chuan vote nei 14224 an awm a, an punna zat chu 167 (1.19%) a ni.