Nimin (6.6.2016) chawhnu dar 1:30 khan Champhai District Green Mizoram Committee chu Champhai District Bawrhsap, Pu Vanlalngaihsaka, IAS hovin DC Conference Hall-ah an thukhawm a, Green Mizoram Day 2016 hmandan tur an rel.

Champhai District Green Mizoram Committee Meeting chuan Green Mizoram Day 2016 hi June ni 11, zinglam dar 10:00 hian CHANEM Complex, Champhaia hawnna neih turin a ruahman a. Hawnna inkhawm hi Champhai DFO in a kaihruai ang a, Champhai District Bawrhsap Pu Vanlalngaihsaka IAS leh Champhai District SP, Pu R.P. Meena IPS ten thu an sawi ang. Green Mizoram Day hawnna inkhawmah hian Champhai District chhunga ramkang ven kawnga thawk tha khaw pathum – Aiduzawl, Teikhang leh Kelkang hnenah lawmpuina pek a ni bawk ang. Sawrkar Department hrang hrangte bakah zirnnain, pawl hming leh mimal a duh apiang tan thing tiak phun turin committee chuan a sawm a, a phun duhte chuan an thing duh zawng leh an duh zat DFO Office-ah June ni 9 ral hma ngeiin report tur a ni. Committee chuan thingtiak phuntu zawng zawngte chu Environment, Forest & Climate Change Department nen tangkawpa an thing phunte uluk taka enkawl zui turin a beisei bawk. Champhai District Green Mizoram Committee chuan Green Mizoram Day hman hun hi Champhai leh a chhehvel leilung leh sik leh sa mil tura sawn hma dan zawn ni se a ti bawk.

Meeting-ah hian Champhai DFO, Pu Vanlalchuailova chuan kum kalta a Green Mizoram Day hmandan report pein kum 2015 khan sawrkar department 17, zirnain 7, YMA Branch 6 leh MUP bakah mimal engemawzatin thing tiak 12,816 an phun a, August 2015-a endik a nih thleng khan 86% vel a nung tihhu a tarlang a ni.

Attachment

  • Loading attachment...