Aizawl Young Men's Christian Association (YMCA) chuan vawiin chawhnu khan YMCA Founders’ Day 172-na lawmna leh Annual General Conference 28-na chu E&F, Cooperation, etc. Minister Pu Lalrinmawia Ralte leh Regional Chairman, North East Region YMCA (India) hovin ZIDCO Meeting Hall-ah hun an hmang a. Khuallian chuan khawvel ram 119 atanga member nuai 57 chuang intelkhawmna pawl lian YMCA hnathawh tangkai zia leh a thiltum pawimawhzia sawiin, Mizo Kristian thalai zingah he pawl a tel nachang hria an tam belh zel a beisei thu a sawi a.
Minister Pu Lalrinmawia Ralte chuan active member tan khawvel hmun hrang hrang ami te nen inkawmna leh interact-na hun leh hmun tha a awm in, khawhawi leh ngaihtuahna a tihzau phah hle dawn a. Active member ni kherlo tan pawh khawvel hmun hrang hranga YMCA hostel-a thlen theih tangkaizia sawilangin, man tlawm te in hmun him leh thianghlim taka thlen theih chu ram danga zin te tan a man hla thin thu a sawi a. Tunlai Mizo thalaite an vakzau telh telh a, ramdangah rikrum thila tlanchhiat palh ngai ta se, security a that avangin YMCA emaw YWCA Hostel-te chu pan hmasak atan a tangkai thei hle dawn a ni, a ti bawk.
Vawiin YMCA Founders’ Day lawmna hi Pu PC Zoram Sangliana, MLA leh Aizawl YMCA President ni bawk chuan kaihruaiin, an member boral ta pahnih – Pu Friday Lyngdoh, Former Regional Chairman leh Pu Zohmingliana Colney, Coard of Director, AYMCA te sunna hun hmangin, YMCA hmuchhuaktu George Williams a chanchin leh Secretary leh Treasurer report te ngaihthlak a ni a. Pu Lalrobiaka, ZIDCO Chairman leh Aizawl YMCA Vice Chairman ni bawk chuan lawmthu sawiin hun hi a khar a. Session hnihna ah rorel in a chhunzawm a ni.
Aizawl YMCA-ah hian tun dinhmunah member 200 chuang inziaklut an awm a, India hmarchhakah member tam berna ani. India hmarchhakah hian affiliated YMCA 30 chuang awm mahse Good Standing (tha taka pawl ding) chu pali - Aizawl, Tanhril, Guwahati leh Nongtala chauh an awm a ni. YMCA hi June ni 6, 1844 khan London-ah George Williams-ah thalaite nun kawng tha zawk kawhhmuhna atan a din a. India ramah chuan 1857 khan din tan niin, Mizoramah 1930 bawr vel khan din tan a ni. Basketball leh Volleyball hi YMCA member te infiamna leh inzawizawi theihna atan member ten an hmuhchhuah a ni. He pawlah hian ringlo mi pawh member a inziah luh theih a, Associate Member nihna an vuah thin a ni.
